Град Скопје сака да постави правила за чување на животни и домашни миленици во дворни места на колекивните и индивидуални станбени објекти.

Ако утре Одлуката чиј прелагач е градоначалникот Коце Трајановски добие зелено светло во Советот на Град Скопје, доколку сакате да чувате или храните куче и животни скитници во заеднички двор на колективен станбен објект, мора да имате писмена согласност на мнозинството сопственици и корисници на дворот, односно соодветна одлука на заедницата на сопственици на посебни делови на зградата, во согласност со прописите за домување.

Сопствениците на домашни миленици, односно лицата што ја презеле грижата за нивно чување и хранење во заеднички двор на колективен станбен објект се должни да го отстрануваат фецесот од дворната површина.

Куче кое се чува во двор, се чува во посебен објект. Објектот за чување на куче мора да биде оддалечен најмалку 3 метри од најблискиот станбен или деловен објект на соседната парцела и од регулационата линија на јавната површина.

Ако кучето се чува во двор, дворот мора да биде ограден и на видливо место да има поставено табла со цртеж и натпис со кој се предупредува на присуство на кучето, а на влезот во дворот мора да има звоно.

Во поглед на условите што се однесуваат на живеалиштата, објектите и опремата, како и на хранењето и негата на животните, живината и домашните миленици, регистрирањето на домашните миленици и нивните сопственици, обврската домашните миленици да бидат обележани (со вграден микро чип) заради идентификација, како и вакцинирани и дехелметизирани, важат законите и другите прописи од областа на благосостојбата на животните и ветеринарството.

Доколку сопствениците на домашните миленици не се придржуваат на одредбите од оваа одлука, домашните миленици ќе се третираат како животни скитници и према нив ќе се примени постапката за заловување.

Градот Скопје, според одлуката, презема мерки за заловување (собирање) на кучиња скитници или нерегистрирани кучиња и нивно сместување во соодветни објекти – прифатилишта.

„Во прифатилиштата се обезбедува елементарна заштита на животните од непогодни временски услови и редовно хранење и напојување, здравствено третирање и нега, лабараториска анализа, стерилизирање, вакцинирање, дехелминизирање, обележување на здравите кучиња, нивно чување до посвојување или, по исцрпување на сите можности за посвојување, нивно враќање во реонот од каде што се заловени, додека болните и агресивни кучиња кои можат да претставуваат сериозна опасност за здравјето на животните или луѓето, ќе бидат убиени со средства на хумана еутаназија“, стои во Предлог-одлуката.

Со одлуката се забранува внесување кучиња, мачки и други животни во јавни установи, како органи на државна управа, општини, болници, амбуланти, и други здравствени организации, училишта, погони за производство на прехранбени производи и во верски објекти.

Според одлуката, куче може да се пушти од поводник и да се движи слободно, во парк и на друга јавна зелена површина, во временски период од 22 навечер до 8 часот наутро, во период на летно сметање на времето, односно од 22 до 9 часот зиме.

Одлуката забранува да се пушти куче од поводник и да се движи слободно на јавна сообраќајна површина, во непосредна близина на училишта, во парк или друга јавна површина каде што има уредено детско игралиште, во дел под цветен засад, како и во парк.

и јас сум за (и не само за Скопје), оти љубителиве на животни стварно ги преминуваат сите граници