Денешното лајв издание на најгледаното регионално шоу најверојатно ќе биде најдоброто досега, барем како што зборат натпреварувачите и менторите кои вредно работат веќе неколку дена и се подготвуваат за вечерва.

Притисокот најверојатно е зголемен двојно за разлика до сега бидејќи оној кој ќе излезе вечерва нема да се најде во големото финале во кое 5 натпреварувачи ќе се натпреваруваат за главната награда во Белград на 23-ти март.

Како и што објавивме, вечерва натпреварувачите ќе пеат песни од своите ментори, што значи дека нашиот Даниел Кајмакоски ќе пее песна од својот ментор Жељко Јоксимовиќ за влез во финалето. Иако песните се тајна, сепак ние дознаваме дека Македонецот ќе ја пее песната „Љубави“ од Јоксимовиќ, за која изјави дека и приватно многу ја сака и со задоволство ќе ја интерпретира вечерва.

- Ова е одлична песна, песна која ја знае целиот регион и песна која според вокалните способности би требало добро да му легне на Даниел. Останува само да видиме дали ќе има некои промени во матрицата, т.е. дали ќе оди во позадина оригиналната музика или пак Даниел ќе не изненади и ќе ни понуди своја верзија, која секако повеќе ќе ги воодушеви менторите и публиката од обично караоке. Дали тој ќе се одлучи на еден вид ризик, или пак ќе оди на добропроверената шема која ја има Жељко останува да видиме вечерва во 21:00 часот, вели избор близок до продукцијата.



Неговиот колега од тимот на Јоксимовиќ, Маид, пак изјави дека е среќен поради специјалните гости во ревијалниот дел на програмата, рок составот, Parni Valjak и нашиот пејач Аки Рахимовски.

- Јас израснав со нивните познати хитови, возбуден сум дека ќе ги слушам во живо и тие ќе настапат на истата бина како и јас. Хитовите "Sve još miriše na nju", "Ljubavna", "Dođi"... беа она што слушав кога раснев, додава Маид, за кој сè уште не знаеме која песна ќе ја пее вечерва од Жељко.