МАКЕДОНЦИТЕ ПОДГОТВЕНИ ДА ГО ДАДАТ НАЈДОБРОТО

Македонските спортисти кои ќе ја претставуваат земјава на Зимските олимписки игри во Сочи (7-23 февруари) се во добра форма. Подготвени се да ги постигнат своите најдобри резултати, порачаа во Македонскиот олимписки комитет, пред заминување на експедицијата за Русија. 

Во Сочи, Македонија ќе ја претставуваат нордијците Марија Kолароска и Дарко Дамјановски и алпинецот Антонио Ристевски. Според редоследот на трките, Kолароска настапува во трката на 10 километри, класично, на 13 февруари. Дамјановски има настап во трката 15 километри, класично, на 14 февруари и на 50 км, на 23 февруари. Ристевски настапува во велеслалом на 19 и во слаломот на 22 февруари. Ристевски и Дамјановски за настапи во Сочи се изборија постигнувајќи највисоки А-норми за учество, а Kолароска има Б-норма. Ова се втори ЗОИ за Ристевски, трети за Дамјановски, а Kолароска дебитира.

Покрај натпреварувачите, во македонската експедиција ќе бидат и тренерите Иван Лесевски (алпско скијање) и Ѓоко Динески (нордиско). Според Динески, Дамјановски и Kолароска се добро подготвени.

- Дарко е искусен натпреварувач. Нормата за учество ја постигна одамна и имаше доволно време да се подготви без притисок. Ако на 15 км се пласира во рамките на олимписката норма, односно до 100 ФИС-точки, ќе сметам дека има добар резултат. Kолароска со резултат до 250 точки треба да биде задоволна – изјави Динески. Помалку ФИС-точки значат подобар резултат. Kолегата на Динески, Лесевски, ја истакна добрата форма на Ристевски.

- Тој има забележителен скок во формата и во резултатите во последно време. Ако така продолжи, се надеваме на добар резултат на ЗОИ. Во нашиот спорт многу зависи и од подготвеноста на патеката и од времето, така што не може однапред ништо да се предвиди - изјави Лесевски, а Антонио го поддржа.

- Ако се погодат временските услови, патеката е во добра состојба, тогаш останатото е на мене и јас ќе покажам што знам – изјави Ристевски. Дамјановски е оптимист.

- Подготовките минаа одлично, во подем сум, последните две недели ги минавме во Словенија каде што ја темпиравме формата. Само да н` послужи здравјето и с` ќе биде како што треба – изјави Дамјановски.

Во Сочи како дел од македонската експедиција ќе патува и потпретседателот на Скијачката федерација на Македонија, Владо Пановски, генералниот секретар на Македонскиот олимписки комитет Сашо Поповски, лекарот на тимот д-р Зоран Ханџиски. Од МОK ќе патуваат и директорот Владимир Богоевски и претседателот Васил Тупурковски. (Б.Г.)

РУСИЈА НИ ПОСАКА СРЕЌА

Амбасадорот на Русија во Македонија, Олег Шчербак, вчера го испрати македонскиот тим за Сочи и му посака многу успех.

- На македонските спортисти во Сочи им посакувам многу среќа и добри резултати. На сите спортисти во Сочи им посакувам успех. Многу сум задоволен што меѓу учесниците на Зимските олимпски игри во Сочи, ќе има спортисти и од Македонија. Домаќинот е подготвен да направи се олимписките и параолимписките игри да минат во најдобар ред – изјави Шчербак.

ЗОИ во Сочи се најскапите игри на сите времиња, а чинат 51 милијарда долари, со што ги надминаа и ЛОИ Пекинг (46,5 милијарди). Ќе учествуваат спортисти од 88 земји, што е подобрување на рекордот од ЗОИ Ванкувер пред четири години кога имаше 82 земји-учеснички.