Приказни за добра ноќ

Пепелашка

Еднаш многу одамна живееше една убава девојка што се викаше Пепелашка, заедно со лошата маќеа и со две приглупави и себични полусестри.

Еден ден кралот ги повика на забава сите девојки од кралството.

Пепелашка немаше свечен фустан и тажно ги гледаше своите полусестри додека се дотеруваа за забавата. Но, наеднаш пред неа се појави добрата самовила и и ги исполни желбите.

Глувчињата ги претвори во слуги, а тиквата во отмена кочија.

Потоа, добрата самовила ја претвори облеката што ја носеше Пепелашка во величествен балски фустан и и направи еден чифт стаклени чевлички.

“Немој да заборавиш дека дворецот мораш да го напуштиш пред полноќ, затоа што тогаш ќе престане дејството на магијата”, - добрата самовила ја предупреди Пепелашка и исчезна.

Веднаш штом се појави на балот, Пепелашка со својата убавина ги засени сите девојќи и го привлече вниманието на младиот принц. Тој веднаш ја покани на танц. Танцувајќи со него предизвикуваше завист кај другите жени.

Сред еден танц часовникот отчука полноќ. Пепелашка се сети на зборовите на добрата самовила и трчајќи го напушти принцот.

Во моментот додека трчаше по скалите го загуби едното стаклено чевличе. Без да се сврти, скокна во кочијата и замина.

Помина полноќ и Пепелашка повторно беше во својата стара и валкана облека.

Следниот ден принцот почна да ги посетува сите куќи во кралството.

“Ќе се оженам со таа девојка што ќе може да го обуе ова стаклено чевличе”,- рече тој.

Со денови залудно го обиколуваше кралството, кога стигна до куќата на Пепелашка. Грдите полусестри безуспешно се обидуваа да ги сместат големите стапала во чевличето.

Потоа се појави Пепелашка и го зема чевличето. На општо изненадување на сите присутни, стакленото чевличе совршено и прилегаше.

Принцот веднаш ја поведе Пепелашка во дворецот, каде што наскоро приреди голема веселба во чест на нивната венчавка.