Даниел Кајмакоски импресионираше со својата прекрасна изведба на „Сонце не ме грее“ од Лозано и успеа да ги добие пофалбите од жирито, но и големиот аплауз на публиката во Белград. Кристина Ковач беше толку многу импресионирана, што дури и го нарече Даниел потенцијален победник на X-Factor, а потоа Емина го пофали дека тој тотално растурил! Жељко целата работа ја сврти на шега, па гордо и рече на Кристина дека уригирал и преку врски го добил Даниел во својот тим.

Откако денеска објавивме дека оваа вечер е вечер на домашна музика, т.е. дека натпреварувачите ќе пеат песни на својот мајчин јазик, веднаш на интернет се појавија коментари со можната песна со која ќе настапат Даниел и Фифи. Ние направивме и анкета во која на нашите читатели им овозможивме да погодат со чија песна ќе настапи вечерва Даниел, а најмногу гласови имаше Владо Јаневски со 37%, додека Лозано имаше само 10% од гласовите.

Фифи, бидејќи е во дует со Маринела и заедно го сочинуваат дуото H20, за разлика од Даниел не пееше на својот мајчин јазик, туку настапи на српски јазик,  односно мајчиниот јазик на Маринела. Тие ја испејаа песната „Чувам те“ од Александра Радович. Фифи беше прекрасна, а нејзината изведба ги воодушеви и членовите на жирито. Единствена нивна забелешка беше тоа дека Кристина им одбрала погрешна песна. За жал, нивната изведба не беше добра за гласачите, па според тоа тие заедно со Александра Секулич мораа да пеат уште еднаш.

Алексадра прва ја испеа песната „Одлазим, а волим те“ од Оливер Мандич, додека дуото H2O ја испејаа познатата песна Follow Rivers. Да бидеме реални Александра нема толку добри гласовни способности како што имаат Фифи и Маринела, но последната изведба ја „извади од калта“. Сепак, жирито одлучи ова да биде последен настап на X-Factor за нашата Фифи и Маринела. Ние и посакуваме на Фифи многу среќа понатаму во нејзината кариера.