НБА раководството и синдикатот на играчите конечно постигнаа договор и лигата сепак ќе се одигра. Но, наместо стандардните 80 натпревари по тим, оваа година ќе се одиграат само 66.

Сепак, ако се земе за пример сезоната 98/99 кога исто така се случи „локаут“ , оваа година и ќе се изнагледаме кошарка. Во таа сезона се одиграа само 50 натпревари.

Јавноста, а секако и тимовите сега се загрижени за повредите, за уморот и за тензијата со којашто ќе мора да се одигра оваа сезона. Имено, стандардните 80 натпревари се играат долг период, околу пет ипол месеци што на тимовите им дава можност за стратегија и за градење на резултатот. Исто така, секој тим во просек ќе треба да одигра натпревар на нешто повеќе од секои два дена или да бидеме прецизни 80 натпревари во 166 дена.

Оваа година сепак, се играат 66 натпревари во 119 дена, што е вистинско компресирање на лигата. Во тие услови, ниту еден тим којшто сака да стане шампион нема да има шанса за кикс, бидејќи ќе нема многу натпревари да се вади, затоа и ќе треба сите играчи да го дадат својот максимум во четирите месеци во коишто ќе се игра.

На ова, исто така треба да се додадат и четирите дена за Ол-стар натпреварот каде што ѕвездите дополнително ќе треба да се потрошат за да ја забавуваат „гладната“ публика. Ол-стар натпреварот е закажан за 24 февруари.

Но, гледачите секако се среќни дека ќе ги гледаат своите омилени тимови за американскиот божик. За тој ден, кога лигата почнува, закажани се три фантастични натпревари. Њујорк Никс - Бостон Селтикс, Далас Маверикс - Мајами Хит и Лос Анџелес Лејкерс - Чикаго Булс