Втора најскапа лига за гледање натпревари во живо е на стадионите во Италија, каде просечна карта изнесува 48 евра.Според истражувањето на Марка, шпанскиот фудбал просечно е најскап за гледање со просечна цена на билет од 53 евра.

На третото место е најквалитетната фудбалска лига на светот, англиската Премиер лига (44 евра), додека по многумина најинтересната лига за гледање, Бундеслигата го држи четвртото место со скромни 30 евра во просек.

Со исклучок на убедливо најевтините влезници во Шпанија кои по цена од 10 евра ги продава Валенсија за последните редови на Местаља, најниската цена која на своите навивачи им ја нудат шпанските клубови е 25 евра за одредени зони на стадионот.

Неверојатен е податокот дека најниски цени на карти во Шпанија, оние за домашните натпревари на Хетафе и Рајо Ваљекано се идентични со најскапите на Етихад (Манчестер Сити) и Бај арената (Баер Леверкузен) и изнесуваат 25 евра.

Интересно е што шпанскиот второлигаш Овиедо на својот стадион наплатува влезници од 25 евра, додека натпреварот од Лигата на шампиони во Леверкузен меѓу Баер и Барселона можеше да се следи за 15 евра.

Најголеми несразмерни цени на влезниците има во Италија. Домашните мечеви на Наполи, каде настапува Горан Пандев може да се гледаат за 9,50 евра, додека да се следи Интер на Сан Сиро чини и до 160 евра.

Специјалност во Примера е клубовите драстично да ги зголемуваат цените пред гостувањето на најсилните клубови. Така на пример, цената за билет за мечевите на Осасуна изнесува од 36 до 60 евра, а при доаѓањето на Барселона и Реал Мадрид се зголемува за повеќе од двојно (90-110 евра).

Во Германија, каде стадионите се модерни шопинг центри и места за излегување и забава, евтините цени во просек се движат околу 18 евра. Најскапите се од 37,50 (Хановер) до 70 евра (Баерн).

Натпреварите на Вердер може да се гледаат за 11 евра, додека домашните дуели на Борусија Мехенгладбах чинат само шест евра.