Бања- када или туш кабина?

Како купатилото да биде секогаш чисто?

Не! Не треба да станете роб на вашето купатило и целото слободно време да го поминувате чистејќи го, но за да изгледа чисто секогаш, а вие сепак да може да уживате во слободното време на поубав начин, треба да знаете како да се организирате.

Одржувањето на чистотата на купатилото не само што ќе ви помогне тој простор од домот да ги задоволува хигиенските услови, туку ќе ви помогне да ги избегнувате макотрпните чистења кога нечистотијата ќе се насобере и наталожи. Еве неколку совети кои би требало да ви ги зачуваат и нервите и времето.

• Без оглед на големината на купатилото, во неа чувајте го само она што ви е потребно на дневна основа. Сите предмети што ги складирате подолго време во купатилото, а не ги користите, само придонесуваат купатилото да собира повеќе нечистотија и да изгледа неуредно.
• Фрлете ги празните шишенца од шампони и парфеми, празните кутии од креми, старите пасти и четки за заби, празните боци од дезодоранси. Не врзувајте се за нив мислејќи дека еден ден ќе ви затребаат.
• Темелно чистете ја тоалетната школка по секоја употреба (пуштајте вода и по неколку пати ако треба и зачеткувајте ја внатрешноста со четката што ќе ја ставите да стои веднаш до тоалетната школка. Дополнително, по потреба, употребете и хигиенско средство за чистење на внатрешноста на школката).
• Под мијалникот чувајте ги средствата и крпчињата за дезинфекција на мијалникот, плочките, поклопецот и надворешноста на тоалетната школка. Со нив, барем еднаш неделно поминувајте ги овие делови од инвентарот. Доколку мијалникот се чисти со средство за дезинфекција двапати неделно, на него нема да се наталожи нечистотија и бигор за кои треба повеќе време да се исчистат.
• По капењето, замијте ја кадата или тушот, не оставајте сапуницата да се наталожи. Тоа направете го со пожешка вода. Стаклото од туш-кабината и површините со плочки забришете ги со мека сува крпа.
• Ако во купатилото тече славината или имате проблем со некоја цевка или казанче, заменете ги веднаш.
• Ако во купатилото има прозорец, отворајте го секојдневно за да може во просторијата да влегува чист воздух.
• Чувајте канта за ѓубре во купатилото за нечистите тампони, влошки, вата, конец за чистење заби, презервативи и друго и не дозволувајте ѓубрето да се насобира, празнете ја кантата еднаш дневно (така ќе може таа да биде помала за да не зафаќа многу простор, а сепак да си ја врши функцијата).
• Практично е купатилото да има издувен вентил и некаков вид освежувач за воздухот, кој ќе му даде пријатен мирис.