Власта и Милетиќ го изгласаа Законот за абортус

Во отсуство на пратеничката група на СДСМ, пред малку во Собранието пратениците од власта го изгласаа Законот за абортус со 62 гласа „за“. Поддршка за законот даде и пратеникот од Српската напредна странка, Драгиша Милетиќ.

До нив последен повик упати пратеникот од ЛП, Ивон Величковски, кој им порача да не го загорчуваат дополнително животот на жените кои се одлучиле на абортус. Величковски беше единствениот пратеник кој гласаше против законското решение.

Министерот за здравство Никола Тодоров го праша Величковски зошто во времето кога претседател на Собранието бил Стојан Андов, во 1995 година, не гласале против одредбите што денеска ги спорат. Во одбрана на законот се приклучи и пратеничката од ВМРО-ДПМНЕ, Бети Кузмановска.

- Опозицијата наместо да ги собира луѓето надвор на протести, треба да биде тука. Ако овој закон беше лош немаше да го гласаме. Треба да им се извините на сите жени што ги нарековте расплодни објекти. Јас така не се чувствувам - му се обрати Кузмановска на Величковски.

Величковски посочи дека административната постапка во законот го отежнува процесот на избор.

- Прифативте номинална расправа, а потоа продолживте со реклами. Со административни постапки се обидовте да креирате популациска политики. Ја вмешавте и црквата, ама ќе ви кажам дека државата ќе биде толку силна колку што ќе ја браниме секуларноста. Стимулирате абортус да се случува во шупи и гаражи наместо да ги едуцирате граѓаните - рече Величковски.