За спомениците на Тит Флавиј, угледната Јулија и енергијата од хидроелектраните Бошков Мост и Света Петка

Еве денес читам за отчетот за Скопје 2014, кој конечно дојде по 4 години, и како владата слаткоречиво не убедува дека не чинел многу и дури бил и економски оправдан.

Во неверица од леснотијата со која се расфрлаат министерката за култура и бившиот градоначалник на Центар со оправдувањата за 207-те милиони евра (нема независна ревизија на оваа сума па нема да ги земам како конечни бројки) решив да споредам некои основни факти од денешниот отчет за #СК2014 со некои веќе изведени, но и планирани инвестициски проекти во Македонија. Ќе ги земам инвестициите во енергетскиот сектор кои се клучни за развојот на секоја држава.

Чисто за споредба ХЕЦ Козјак чинеше 170 мил € и освен тоа што е најголемото вештачко езеро во Македонија со должина од 32 км , го штити Скопје од поплави, обезбедува вода за наводнување на Скопско поле, а произведува и 150 (GWh) ГИГАВAT часови електрична енергија годишно! ХЕЦ Козјак започна да се гради 1994 година, а се пушти во употреба 2004-та. Исто како и #СК2014, и тука се вработуваа работници и ангажираа наши градежни компании.

Колку за информација потрошувачите од домаќинствата (НИЕ) купуваме КИЛОВAT електична енергија по 3.24 ден од КВ час. Е сега, би Ве замолил во пауза помеѓу 2 владини реклами, кои ни кажуваат за тоа колку ни е убаво и како знаењето е сила и знаењето е моќ, да го употребите знаењето на работа со дигитрон и да помножите и да се обидете да пресметате колку пари се 150 ГИГАВАТ часови електрична енергија и да замислите каков е економскиот ефект на проект во кој се инвестирани 170 мил €, колку работници вработува ХЕЦ Козјак денес, колку плати обезбедува и колку профит остварува откако ќе се пресметаат сите трошоци на производство и пренос на електрична енергија. И не мора да сме експерти во ова поле, но еве да се запрашаме и да се замислиме дали е економски пооправдан наспроти проектот #СК2014 за кој граѓаните на Центар покрај сите притисоци јасно кажаа НЕ на избори и тоа 3 пати во 6 недели!

Знам дека сите не боли глава од високи математики и споредби и поради тоа дојде тешко време на лесни турски серии, велики братови, Стании, Сораи и танци со sвезди па веќе немаме ниту трпение, ниту енергија дури и да размислуваме со сопствената глава, но дали е многу да одвоиме дел од нашето време и да се помачиме да ги вклучиме мозочните вијуги за да пресметуваме или да користиме логика? Чисто за споредба, еве да да се запрашаме #СК2014 колку струја произведува за инвестиција од 207м €? Колку профит остварува? Колку троши на “одржување”?

Колку КИЛОВАТ часови енергија произведува инвестицијата во спомениците на Великанот Тит Флавиј Орест, влијателната граѓанка Јулија Тертила, угледниот Публиј Септиј Никола или 3-те врби поставени во сред Вардар, кои се најверојатно зелени извори, ама на необновливи на 250,000 евра!

Moже ли да помислиме следниот пат кога ќе ги видиме тие потсетници на историјата колку струја произведуваат “ногууу” убавите Тит Флавиј и Јулија Тертила, во земја како нашата, во која увезуваме 1/3 од нашите севкупни потреби за електрична енергија! Да не зборувам на празно, еве и неколку факти.

Изградбата на ХЕ Света Петка ќе чини 80 милиони евра со ефект од годишно производство од 66 (GWh) ГИГАВАТИ, ХЕ Бошков Мост ќе чини 107 милиони € со годишно производство од 117 (GWh) ГИГАВАТИ. Тоа се вкупно 187 милиони € инвестиции или 20 милиони € поефтино од #СК2014, а ќе се произведуваат 183 (GWh) ГИГАВAT часови електична енергија потребни за развојот на нашата земја, a воедно и ќе се намали увозот на електрична енергија!

Не знам за вас, ама за мене е апсолутно потценување на интелигенцијата на граѓаните во Македонија кога некој 2 саати на прес конференција ме убедува дека 207 милиони евра потрошени за централното градско подрачје се претставуваат како економски оправдани и кога се тврди дека не се многу пари!

Можеби на многумина ќе им биде многу убаво кога ќе пијат еспресо од 100 ден со поглед во задникот на Букефал, но факт е и факт ќе остане дека Македонија во меѓувреме сеуште ќе увезува електрична енергија ние сме и ќе бидеме енергетски зависна земја која троши драгоцени средства на погрешни приоритети!

За крај уште ден ДОСАДЕН податок за кој сигурно не размислуваме додека ги гледаме сите оние убави “инстаграм” слики од мостот Око, а тоа е дека ние допрва ќе се задолжуваме за реалните енергетски потреби на Македонија. Ако го отворите веб сајтот на ЕЛЕМ ќе најдете документ кој се вика инвестициски план и во него се наведени сите планирани инвестиции во енергетскиот сектор за периодот кој следи. Aко го отворите тој документ и го прочитате ќе сфатите дека Македонија само за изградбата на Бошков мост, Света Петка и ревитализацијата на некои помали постоечки објекти ќе се задолжи за нови 200 милиони евра кои по каматите ќе бидат многу повеќе, а ќе ги плаќаат нашите деца кога ќе пораснат.

Во меѓувреме епресото на плоштадот ќе поскапе, Тит Октавиј и Јулија ќе останат дел од една историја, a иднината на нашите деца ќе биде обременета со доспеани камати на едно неодговорно владеење, во кое историјата ни е поважна од енергијата потребна за развој! И се затоа што не сакаме да се помачиме да употребиме малку логика и основни калкулации со обичен дигитрон. Наздравје нека ви е еспресото.

Крај на статијата....