Мејк ап-во слики и коментари

Летна шминка

Летово може да ги заборавите сенките, маскарите и карминот, но не заборавајте го кремот за заштита од сонце.

Кремот против силните сончеви зраци, со фактор не помал од 15, ќе ви ја заштити кожата од предвремено стареење.

Заменете ја тешката основа за шминка (пудрата) со лесен крем. Ако е потребно, употребете малку коректор за да ги камуфлирате впечатливите недоследности на кожата.

Наместо руменило, нанесете камена или пудра во прав со бисерна или бронзена боја. Ќе добиете ефектен, природен изглед.

Основното правило за летната шминка важи и за сенката за очи – помалку е повеќе!

Маскарата треба да биде водоотпорна за да се избегнат непријатни ситуации. Не мора да биде црна, ефективно ќе делуваат и кафена, сина или виолетова.

Усните заштитете ги со балсам со УВ-заштита. Со боја на корал, малина или праска и течен сјај како завршница, ќе го добиете убавиот ефект „водени усни“.

Шминка за синооки

Сините очи се длабоки и привлечни и обично многу бои на сенки убаво прилегаат на сини очи. Ова лето, пробајте портокалово!

Ако, сепак, сакате да сте во мода, еве што препорачуваат шминкерите за ова лето.

Портокалови сенки

Топлите портокалови сенки, било да се пастелни или сјајни, ги потенцираат сите нијанси на сино. Портокловите нијанси ги прават сините очи уште подлабоки и поубави. Комбинирајте со моливче за очи и маскара за поизразени трепки. Актуелни нијанси на портокалово се од лососово портокалово до мандарина.

Златни сенки

Оваа боја на сенки се употребува во посебни пригоди и пригодна облека. Синото тогаш изгледа уште посино. Комбинирајте со розево руменило и кармин.

Бакарни сенки

Комбинацијата од кафено, портокалово и металик или, со други зборови, бакарно, го засилува контрастот на сите сини нијанси. Овие сенки особено добро одат во комбинација со светлосини или сивкасти очи. Најдобро прилега на кожа потемнета од сонцето. Употребете и руменило во истата нијанса.

Кафена сенка и маскара

Може да се искористи за дневна и вечерна шминка. Кафената боја е најпогодна за секојдневна употреба бидејќи е најблиска до природните сенки на очните капаци. Го потенцира синото. Комбинирајте ја со кафена маскара, која ќе го направи погледот различен. Заменете ја црната маскара со кафена, која е подобра за топлите сезони. Облека која одговара е секодневни џинс-панталони и бел лен.

Темносино моливче за очи или сини сенки

Темносиното моливче одговара на сини очи и ја потцртува нивната длабочина. Истовремено на погледот му дава драматичен, артистички изглед. Сините сенки се класика, само не претерувајте со количината, еден слој е сосема доволно. Погледот во лето треба да е лесен и палав. Доволно е да додадете и само еден слој маскара.

Блескави очи

Изберете сјајни и светкави сенки за вечерно излегување, само избегнувајте ги сивите нијанси. Изберете светли нијанси, кои ќе му дадат посвеж и младешки изглед на целото лице.