Пред само една година беа херои на нацијата. Во нив сите се крстат, со нив сите сакаат да се „сликаат“, но ги испратија да се влечкаат по споредните аеродроми низ Европа, како „последни дрипци“, а треба да ја претставуваат Македонија на Светско првенство.

Конечно, ракометарите вечерва пристигнаа во Севилја. Измалтретирани, со уште една траума што можат да им ја приредат само раководните луѓе од РФМ, претседателот Михајло Михајловски и генералниот секретар Марјан Начевски. На испраќање со нив се „сликаа“ и претседателот Ѓорге Иванов и директорот на Агенцијата за млади и спорт, Лазар Поповски, а сигурно ќе сакаат тоа да го повторат и доколку Лазаров и соиграчите направат успех на мундијалот. Ќе ги тапкаат по рамо и повторно ќе им велат дека тие се хероите на Македонија. Ќе им организираат и дочек пред Триумфалната порта. Ќе ги чекаат на граница, со подготвени фоторепортери за да им удрат уште една заедничка фотка.   

Но, денеска најдобрите македонски ракометари повеќе од 20 часа си ги оставија коските по евтини авиончиња и споредни аеродроми, тргнаа во 3 часот наутро од Скопје со автобус до Софија, потоа одлетаа за Италија, па „дремеа“ таму како туристи кои едвај можат да долетаат до својата наредна дестинација. Оттаму заминаа на спореден аеродром оддалечен повеќе од 200 километри од Севилја. Во меѓувреме, се ценкаа и молеа да им биде понесен и багажот, спортската опрема со која треба да играат на Светското првенство во Шпанија.

Нели е доста?! Нели е премногу?! Редно е да „летаат глави“ и тоа оние најголемите, од врвот на РФМ, затоа што таму најмногу смрди! Доста е веќе со изговорите „нема пари“, а во фотелјите се вдомени „сто години“ и многу им е убаво. Е, како мајката, ако навистина нема пари!

Каде ли и се парите на најдобрата спортска федерација во Македонија?! Заслугите за нивниот избор одат на адреса на ракометарите и ракометарките, а тие не можат ниту да добијат достоен авионски билет за да отпатуваат на најголемиот светски ракометен хепенинг. И тоа никој не им го подари. Сами си го заслужија.

Распоред на натпревари во групата на Македонија