Војна на улиците низ Европа

Европската унија вчера ја потресоа најголемите простеси против строгите мерки на штедење и невработеност, организирани во 23 земји и во повеќе од 120 градови. На улиците имаше повеќе од милион луѓе, а најжестоките демонстрации се одржани во Шпанија и во Италија, во кои демонстрантите се судрија со полицијата.

Во Шпанија се повредени најмалку 38 лица, а повеќе од 80 се приведени, додека во Италија, исто така, се повредени десетици демонстранти. Штрајкот целосно ја парализира Шпанија, а на улиците на поголемите градови се водеше војна меѓу полицијата и незадоволните луѓе. Во вториот генерален штрајк оваа година се придружија речиси сите работници од индустријата на автомобили, енергетика, бродоизработка и градежништво.

Во Италија, во Милано и Торино, најмалку шест полицајци и десетина студенти се повредени, а во престолнината Рим десетици илјади луѓе ја нападнаа полицијата. Во останатите земји - Португалија, Франција, Германија, Британија, Белгија, Грција, Полска - се одржаа главно мирни демонстрации. На улиците излегоа стотици илјади луѓе и целосно ги задушија некои градови.

Во престолнината на Британија, Лондон, се случи расправија меѓу работниците на железницата, кои протестираа поради отказите на 28 колеги и полицијата ги растера со солзавец. За разлика од вообичаените протести во Грција овој пат имаше мирни протести. Иако Грците трет пат за два месеца излегоа на протести, тоа беше на три часа.

http://www.plusinfo.mk/vest/66374/Vojna-na-ulicite-niz-Evropa?utm_source=daily.mk