Опозициската СДСМ денеска преку соопштение реагира на пласираните тези на македонските здруженија во Австралија, каде се истакнува дека тие се против премиер Албанец, во евентуална коалиција помеѓу СДСМ и ДУИ.

-Искрено жалиме што управата на федерацијата на македонски организации во Австралија дозволува да биде злоупотребена за дневно политичките потреби на ВМРО-ДПМНЕ, потпишувајќи се на нивните ракописи. За нас е разбирлива тенденцијата на ВМРО-ДПМНЕ, откако покажа тотална неспособност и немоќ да ги заштити државните интереси, за сопствениот неуспех да ги обвинува другите. Токму во периодот кога на виделина излегуваат сите тајни пазари помеѓу ВМРО-ДПМНЕ и ДУИ, Груевски на подмолен начин се обидува да пласира целосни лаги, измислици и клевети. Крајно е лицемерно и истиот оној кој четири години ја дели власта и фотелјите со ДУИ, да се обидува да обвинува друг за наводни преговори со истата партија – се вели меѓудругото во реакцијата на СДСМ.

Од партијата се истакнува дека во интерес на вистината, потенцираат дека  СДСМ ниту преговара со ДУИ, ниту има намера да партиципира во влада во која премиер ќе доаѓа од редовите на ДУИ. Оттаму изјавуваат дека доколку постои изневерување на македонските национални интереси, тоа директно произлегува од начинот на кој владее актуелната власт.

-Македонија не е лична сопственост на Никола Груевски и тој не смее да ја користи за лично пазарање и купување рејтинг“ – се вели во писменото соопштение од СДСМ.