Предводниците на Македонската кошаркарска федерација (МКФ) и на Македонскиот олимписки комитет (МОК), утре (12 часот), на прес-конференција ќе треба да јавно да обелоденат дали планираат да преземат одговорност за неуспехот на предолимпискиот турнир во Каракас, каде што жолто-црвените беа елиминирани уште во четврт-финалето, но и за најмалата олимписка делегација во досегашната историја, која ќе има само четворица македонски спортисти на Летните олимписки игри (ЛОИ) во Лондон.

Димевски и Лекиќ пред новинарите ќе можат да понудат одговор на критиките од јавноста

Кошаркарите имаа огромна шанса да ја израдуваат нацијата со обезбедување олимписка виза во Каракас, но лошата игра, пред сè во одбраната, придонесе неочекувано да загубиме од селекции како Ангола и Доминиканска Република и предвреме да се вратиме тоа. Јавноста главниот виновник за ваквиот неуспех ја виде во одлуката на челниците на МКФ да не му понудат нов договор на доскорашниот селектор Марин Докузовски, еден од најзаслужните за четвртото место на ланското ЕП во Литванија, поради што сè погласни станаа барањата за заминување на претседателот Даниел Димевски и неговата десна рака, генералниот секретарДејан Лекиќ. Нетранспарентноста во работата, хаосот во младинските лиги, константно лошите резултати на младинските селекции, хаотичното делување на Канцеларија на МКФ, која дури и не знае кога игра најдобрата сениорска репрезентација, се само дел од замерките на работата на предводниците на македонската кошарка

Утрешната средба со новинарите е првата можност за двоецот Димевски-Лекиќ со оставки да одговорат на ваквите барања или, пак, да понудат контрааргумент зошто не би заминале кога се видени како најголеми виновници за пропуштената историска шанса за настап на една македонска селекција на олимписки турнир.

Ќе понесат ли одговорност за лошата работа на МОК и на МКФ? Тупурковски и Димевски

Изминатиов период големи критики имаше и на сметка на предводниците на МОК, кои иако немаат директно учество во развојот на спортистите што би требало да нè претставуваат на најголемиот светски спортски собир, сепак, не може да бидат амнестирани од овој, според многумина, срамен настап на Македонија на ЛОИ во Лондон со само четворица спортисти (најмалку досега) со специјална покана, кои со своите остварувања се неколку децении зад конкурентите и за кои ќе биде успех да не завршат на некое од првите три места – ама одзади.

Васил Тупурковски е на чело на МОК повеќе од две децении и сè погласни се мислењата дека е дојдено време за промени, за нови ветришта во оваа организација, која треба да се избори за можеби лидерско место во креирањето нова македонска спортска стратегија, која ќе биде во согласност со новите движења на светската спортска сцена, но и за чие остварување ќе биде создадена соодветна финансиска база. Останува да се види каков ќе биде одговорот на Тупурковски и на неговите соработници.