СКОПЈЕ 2014 или ЛУНА ПАРК '14

Скулптурата е леена во српската леарница "Јеремиќ", која во рок од шест месеци ја излеа и ја испорача во општината. Скулптурата е со висина од 5 метри, постаментот е со висина од 3,5 метри, а согласно проектот на постаментот ќе се постават четири релјефи од бронза со вкупна површина од 8,4 квадратни метри

Со тешка механизација и десетина работници контролирани од надлежните од Општината Кисела Вода вчера на локацијата Чешма меѓу улиците "Првомајска" и "Иван Козаров" беше поставено спомен-обележјето "Македонски војвода на коњ". Екипата од десетина членови, усогласени со градежните активности, рано изутрината поради топлото време најпрво прецизно го подготвија теренот, каде по неколку часа успеаја да го постават новото обележје на општината кое од денес ќе стои при самиот влез во неа. Според Министерството за култура, кое го реализира проектот, за скулптурата наменски има издвоено 21 милион денари, во што е вклучен и хонорарот на авторот на скулптурата, Миле Брцески.

Скулптурата е леена во српската леарница "Јеремиќ", која во рок од шест месеци ја излеа и ја испорача во општината. Општината Кисела Вода во изминатиот период за обврска имаше да го изгради постаментот и да го уреди околниот простор за што од својот буџет одвои 4,5 милиони денари. Постаментот го градеше фирмата "Нела Ар" од Скопје, што општината ја чинеше 3.281.000 денари.

Скулптурата е со висина од 5 метри, постаментот е со висина од 3,5 метри, а согласно проектот на постаментот ќе се постават четири релјефи од бронза со вкупна површина од 8,4 квадратни метри. Во следниот период општината Кисела Вода треба дополнително да го уреди хортикултурно и партерно околниот простор.

Инаку во центарот на Скопје исто така се работи на поставување и на споменикот на Основачи на ВМРО, споменик што дополнително ќе го разубавува паркот Жена-борец.
Споменикот на револуционерот Димитрија Поп Георгиев Беровски треба да биде новитет на плоштадот Македонија. Споменикот ќе биде поставен пред кафулето "Експириенс" на постамент од 3,5 метри височина истотака со бронзени релјефи.

Досега, како дел од проектот "Скопје 2014" беа поставени десетина споменици и спомен-обележја на личности и настани кои оставиле значителен впечаток и придонеле за македонската држава и народ.

Граѓаните задоволни од спомениците кои не само што го разубавуваат централното градско подрачје, туку и придонесуваат за подигнувањето на националниот дух. Од спомениците кои изминативе година дена беа поставени во Скопје граѓаните најмногу беа импресионирани и воодушевени од централниот споменикот "Воин на коњ" и фонтаната под него на плоштадот Македонија.

(Д.С.)