Балада, брза или песна со фолк мотиви за Евровизија?

По минатонеделното официјално објавување на веста дека МРТ одлучи македонски претставник на Евровизија 2012 да биде Калиопи, таа по враќањето во Скопје ја одржа првата прес конференција. Очигледен беше интересот кај новинарите од една и возбудата кај Калиопи од друга страна:

- Она што е сигурно е фактот дека ќе пеам на македонски јазик. Првично сакавме да понудиме три модела, три тима автори кои ќе направат балада, брза и песна со етно мотиви. Меѓутоа, заедно со тимот на МРТ решивме да одбереме една песна која во средината на февруари во специјална шоу емисија ќе биде претставена пред македонската јавност. Овој настап не е мој настап, овој настап е за Македонија и затоа одговорноста целосно ја преземам врз себе.

Во периодот кој следува, Калиопи интензивно ќе контактира со автори во земјава, но и со наши автори кои живеат надвор од Македонија. Не е исклучена можноста нашата песна да биде дело на странски автор. Веќе има добиено понуди од автори од: Белгија, Израел и Шпанија.

- Ќе компонирам и самата, па ќе видиме што заедно со МРТ на крај ќе одбереме. Сакам песната да има аранжер и посебно светски значаен продуцент. Сè уште не сум сигурна дали треба да настапам со силна балада, со енергична песна, какви што пее Тина Тарнер или со песна во која на модерен начин би биле спакувани нашите фолклорни мотиви.

Шефот на македонската делегација Мери Попова истакна дека песната ќе биде снимена на повеќе јазици и ќе биде пласинара во што поголем број држави пред изборот. Од песните кои ќе влезат во потесен избор ќе биде издадено ЦД.

Во однос на очекувањата, Калиопи е децидна: „За мене успех ќе претставува достојно да се претставиме и да оставиме впечаток. Не се оптоварувам со пласман. Целата позитивна енергија ја чувам и ја насочувам за Баку, зашто со настапопт на Евровизија се чувствувам како повторно да сум родена, како да се раѓа нова Калиопи.

Видео спотот за македонската евровизиска песна „Црно и бело” на Калиопи постави рекорд. Со речиси 1,2 милиони кликања, видеото е досега најгледано на каналот Youtube од некој македонски музичар.

Според посетите на видеата од полуфиналната, финалната и вечерта кога беше претставена македонската песна, Калиопи има речиси 4 милиони кликања. Оваа импресивна бројка е потврда на фактот дека Македонија во Баку имaше квалитетна песна, впечатлив настап и сето тоа благодарение на исклучителниот вокал на Калиопи. Впрочем бројките зборуваат за тоа дека Калиопи предизвикала интерес во целиот свет.