Навивачите на Вардар влетаа во терен за да прослават со новите шампиони 

За само една година, откако клубот практично пропадна со испаѓањето во Втората лига, вардарци административно спасени, реформирани и реновирани за неполни 12 месеци имаа вистинска „црвено-црна ренесанса“, која денеска ја завршија со крунисувањето за нов владетел во македонскиот фудбал, на три кола до официјалниот крај на сезоната.

Со извиците „шампиони, шампиони“, околу 200 навивачи на Вардар кои во приватна режија допатуваа во Кратово за да го бодрат вардар на првата меч топка за шампионската титула, едвај дочекаа да заврши мечот за да влетаат на теренот на стадионот на Силекс и да ја прослават првата шампионска круна по големиот пост.

Предводени од Илчо Ѓорѓиоски, и одлично склопениот тим и правилно избраните странци, предводен од капитенот и првиот стрелец на лигата, Филип Ивановски, Вардарци во текот на целата сезона доминираше и сосема заслужено на крај се радува на шампионската круна. Вардар го победи Силекс со 2-1 со двата гола на Ивановски во првото полувреме, со што голгетерот на црвено-црните стигна до бројката од 23 погодоци во оваа сезона, а на Вардар му ја донесе неопходната победа откако патот кон трофејот вчера го отвори Металург со поразот во Тетово кај Ренова.

Вардар на три кола до крајот има девет бода повеќе од Шкендија од која ја презема шампионската круна, но тетовскиот клуб нема теоретски шанси за да ги стигне вардарци, затоа што веќе има негативен биланс во меѓусебните дуели поради двата порази во првите две рунди со 2-0 и 1-0.