Едно црно сценарио пред неколку дена објави порталот teuhid.net кој се занимава со религиозни прашања кои ги засегнуваат Албанците во регионот, пренесува Канал 5 телевизија.

Планот составен од седум точки, полека се остварува. Втората точка гласи „Масовни протести“. Планот започнува со наредбата албанските муслимани да се информираат преку социјалните мрежи и да не бидат робови на медиумите.

Во врска со протестите, ваквиот план вели истите да ги водат и организираат млади луѓе кои немаат партиски интереси.

Петтата точка од ваквиот план која струи меѓу радикалните исламисти, вели дека треба да се блокираат полициските станици во местата населени од Албанци.

„Да се открие идентитетот и адресата на секој оној полицаец Албанец-муслиман кој по било која основа соработува со македонската власт“. Вака гласи шестата точка од планот објавен на Интернет.

Муслиманските лидери и оџите да помогнат во спроведувањето на ваквите активности, бара планот во последната точка.

Планот кој најавува црно сценарио е објавен од Шукри Алија. Тој беше прогласен за „персона нон грата“ од страна на Европската Унија. Истовремено, Алија се сомничи за нападите во две полициски станици, нему му се судеше за убиство на таксист, а според МВР бил дел од групата која ги претепа имамите во Кондово. Алија е во бегство и од таму ги објавува ваквите црни сценарија.

Има ли Алија свои следбеници во Скопје и дали токму тие се организатори на протестите против „Монструм“ се прашањата чии одговори ќе кажат дали радикалните исламисти си го исполнуваат црното сценарио во Македонија.