„Не требаше децата, требаше да се удри по униформа”. Вака пред Судот зборел еден од приведените во акцијата „Монструм“, според извори на Макфакс.

За време на сослушувањето во истражното одделение во Основниот суд 1, осомничениот појаснил дека требало да се застрелаат полицајци.

Под силно полициско обезбедување се испрашувале осомничените. 

-Проблем со кој се соочиле истражните судии било да се најдат адвокати за приведените. Никој од повиканите по службена должност, за оние кои немале повикано приватно адвокат, не сакал да се нафати да ги брани осомничените. Дури и познати адвокатски имиња не прифатиле да ги застапуваат, објави Макфакс.

Неофицијално Макфакс дознава дека дел од приведените кои решиле да зборуваат пред истражен судија тврделе дека биле дел од група која се занимава со нелегални активности, но за пари. Се правдале дека наводно биле многу сиромашни поради што прифатиле да чуваат дома оружје.

Дваесет лица беа уапсени во полициската акција „Монструм“. 

Петмина од нив ќе одговараат за кривично дело „тероризам“, по петкратното грозоморно убиство. Двајца се во бегство и по нив од вчера трага и Интерпол.