Град Скопје не се откажува од проектот за трамвајот кој треба да сообраќа низ нашата метропола. Тој ќе почне да се гради до крајот на годинава.

Во јуни месец ќе биде распишан тендерот за концесионер, а во меѓувреме ќе се утврдува со колкав буџет ќе се субвенционира проектот од страна на Градот или од Владата.

Концесионерот ќе мора да се погрижи за изградба на трасата и за набавка на трамвајот.

Првата фаза за реализација на трамвајот ќе ја опфаќа трасата од Ѓорче Петров, преку „Партизанска“ до Ново Лисиче, која ќе биде долга околу 15 километри. Таму каде што ќе сообраќа трамвајот, нема да има автобуска линија.

Реализацијата за проектот ќе започне до крајот на годинава, а рокот за изведба е од 2 до 3 години, a за изградба на трамвајската линија ќе бидат потребни околу 180 милиони евра

Досега за деценискиот трамвајски проект биле заинтересирани неколку странски фирми од Франција, Германија, Полска, Чешка и Хрватска.

Покрај трамвај, Скопје следната година ќе добие и нов Луна парк. Изградбата на паркот од 40 000 метри квадратни се најавува за пролет, а ќе чини околу 10 милиони евра.