Калиопи

Калиопи со албум на три јазика

Новиот албум на Калиопи "Порака" е снимен на три јазика: македонски, хрватски и на англиски јазик. Со овој проект, поп дивата, откако се врати на екс југословенскиот музички пазар, планира да го освојува и европскиот.
Во Скопје, албумот ќе се промовира со голем отворен концерт на Скопскиот плоштад, најави Калиопи на почетокот од летото. Поп дивата како најавен сингл веќе го промовираше хитот "Јас не сум како ти", песна за која неодамна излезе и видео спот. Минатата недела во Загреб, во просториите на "Јадран филм", Калиопи снимаше дел од новиот спот за синглот "Ти", кој ќе се промовира заедно со албумот. Со новиот сингл, Калиопи ја најавува својата соработка со хрватските видео продукции "5 груп" и "Д нок продукција".
Дел од спотот ќе се снима и во Македонија, а интересно е што некои од сцените во Загреб се снимени во "3Д" графика.
Музички продуцент на албумот е хрватсскиот музичар Дарко Јурановиќ, во соработка со Тихомир Прерадовиќ.
Тимот на поп дивата во моментов работи на обвивката на албумот, по што цедето ќе започне да се печати

Калиопи со бесплатен концерт за фановите

Калиопи ќе го промовира новиот албум "Порака" заедно со своите фанови. Поп-дивата ќе одржи бесплатен концерт на скопскиот плоштад на 30 октомври во 20 часот. На концертот во живо ќе бидат изведени единаесетте песни од албумот, како и старите хитови на Калиопи.
Албумот, кој е петти по ред студиски цеде-албум на Калиопи, има 11 песни. Осум се сосема нови, а за публиката познати се "Не сум како ти", "Ти" и бонус-песната "Засекогаш", која ја напиша Тоше Проески, а Калиопи ја сними за албумот "Тоше и пријателите". Музички продуцент на албумот е Дарко Јурановиќ од Загреб, а Тихомир Прерадовиќ е копродуцент. Материјалот е снимен во неколку студија во Хрватска и во Шведска. Освен Јурановиќ и Прерадовиќ, како автори се јавуваат и Калиопи, Мирослав Рус, Рамбо Амадеус, кој е гостин, котекстописец и коаранжер на песната "Дојди". Во песната "Денот се буди" гостува словенечкиот пејач Марко Возељ. Един Карамазов е гостин во песната "Ако уште еднаш падне снег".
Во својата 25-годишна кариера, Калиопи има снимено 11 албуми. Два со групата "Калиопи", пет поп-студиски албуми, две компилации со најголемите хитови, еден албум со музика за балетот "Јас Исидора" и последниот "Обливион" со Един Карамазов, со преработки на светските музички класици. Поп-дивата издаде и ДВД-издание од скопскиот концерт во 2006 година.

Калиопи претставник на Македонија на Евросонг 2012 во Азербејџан