Околу 30 лица се ранети синоќа во Букурешт за време на протестите против владините мерки за штедење, кои преминаа во судири, изјавија медицински претставници.

Владиниот кабинет одржа синоќа вонредна седница поради насилните демонстрации, кои не покажуваат знаци дека ќе стивнат.

Директорот на Службата за брза помош на Букурешт Кристијан Грашу изјави дека во протестите се ранети 33 лица. - Петнаесетина од нив, меѓу кои и тројца полицајци, се одведени во болница, а на останатите им беше пружена медицинска помош на лице место, додаде тој.

Новинар од приватната телевизиска станица Антена 3 беше удрен од демонстранти, додека говореше во живо.

Околу илјада лица се собраа вчера попладне на Универзитетскиот плоштад во Букурешт, барајќи оставка на претседателот Трајан Басеску, кого го обвинија дека е главната причина за сериозното влошување на животниот стандард во Романија. Во текот на вечерните часови стотина млади лица, од кои повеќето со качулки, почнаа да фрлаат камења и петарди кон полицијата, со што го повторија „сценариото“ од претходниот ден. Полицијата употреби солзавец за да ги растера демонстрантите, кои блокираа еден од главните булевари во Букурешт.

Според полицијата меѓу лицата, кои ги предизвикале немирите имало фанови на фудбалските клубови од Букурешт, Динамо и Стеауа. Неколкумина од нив носеле плакати со пароли „Горд сум дека сим хулиган, слобода за навивачите“.

Во саботата педесетина лица беа приведени поради учество во насилен протест, во кој беа ранети десет лица, меѓу кои и четворица полицајци и еден телевизиски работник.

Демонстрации вчера беа организирани во десетина големи градови во Романија.

Премиерот Емил Бок од Демократско-либералната партија упати повик за дијалог, нагласувајќи дека фрлањето на камења не е решение. На прашањето за евентуалната оставка Бок напомена дека Парламентот е тој што треба да реши за судбината на Владата. - Во сегашниот период на криза, политичката стабилност е од клучно значење, додаде тој.

Две опозициски партии обединети во коалиција, социјалдемократите и конзервативците повикаа за свикување на вонредна седница на Парламентот, на која ќе биде разгледана „сегашната политичка ситуација и досега невидените социјалните тензии“.