Престижната лондонска стоковна куќа Хародс во текот на оваа недела ќе изложи неверојатна колекција луксузни предмети со Сваровски кристали, меѓу кои ќе се најде и блескав фустан кој чини нешто повеќе од 266.000 евра.

Долгиот гламурозен фустан е изработен од реномираниот моден бренд Ralph&Russo, а ќе биде дел од изложбата наречена „Кристален Божиќ“, која ќе биде отворена за време на празничната сезона.

Креативната директорка на Ralph&Russo, Тамара Ралф, изјавила дека штом ѝ била понудена задачата да создаде фустан со Сваровски кристали, веднаш добила инспирација од гламурозниот стил на 20-тите години.

„Ова е првпат да искористиме толку многу кристали на еден фустан, да бидам попрецизна точно 152.000. За изработка на тоалетата беа потребни стотици часови и повеќе од 25 шивачи, но сме екстремно задоволни од завршената тоалета“ – изјавила Тамара.

Брендот Ralph&Russo е познат по екстравагантните тоалети со кристали за холивудските ѕвезди како Анџелина Џоли, Бијонсе и Ева Лонгорија, кои со став ги носат на големите свечени настани во Холивуд.