Париската недела на модата: колекции пролет/лето 2012

Париз беше домаќин на бурна и атрактивна модна недела, која заокружи еден фешн месец исполнет со многу ретро гламур, фантазија и креативност.

Александар МекКвин

Стилот на модната куќа Александар МекКвин е толку уникатен и препознатлив што секогаш ќе буди воодушевување. Сара Бартон, чие име се поврзува со венчаницата на Кејт Мидлтон, уште еднаш покажа дека лекциите на покојниот МекКвин се врежани во нејзиниот ум.

„Таа е брилијантна во својата работа. Очигледно таа ги зема сите негови карактеристични црти и на некој начин им дава светлина. Навистина беше фантастично, дури и триумфално“ – коментирала Александра Шулман, уредничка на британскиот Вог.

Кристијан Диор

Додека модниот свет со нетрпение очекува да дознае кој ќе ја преземе диригентската палка во Диор по Џон Галијано, тимот на оваа модна куќа работи под раководство на десната рака на Галијано, Бил Гајтен.

По мешаните критики кои ги понесе колекцијата висока мода, Гајтен реши да донесе поедноставна и побезбедна колекција инспирирана од гламурот на 50-тите години. Спојот од романтика и сексапил беше преточен во облеката преку проѕирни ткаенини, рафинирани набори и женствени ретро шапки. Не остана незабележано присуството на кожа и твид.

„Сметам дека беше навистина убаво: прекрасна лесна вечерна облека – тоа беше голем скок нанапред од couture шоуто, особено со лесната изработка од чипка и шифон. Можам да го видам сето ова на црвениот тепих“ – изјавила Лусинда Чемберс, моден директор во британскиот Вог.

Ланвин

Драматичното шоу на дизајнерот Албер Елбаз го стави на преден план готик стилот. Една по една манекенките покажуваа крстови изработени од бисери, огрлици и токи на колани во форма на орел, скапоцени додатоци во форма на змија извезени околу фустани...

При дизајнирањето на колекцијата, во главата на Елбаз се вртела слика на ангел во пеколот. Можеби нагласените раменици, кои им дадоа посебна силуета на креациите, беа на некој начин крилјата на тој ангел.

Жан Пол Готје

Тетоважите беа главен мотив во колекцијата на Жан Пол Готје. Тату-принтови можеа да се видат врз хулахопки, фустани, панталони, но и врз кожата на манекенките. Секоја манекенка што дефилираше носеше број во раката, исто како на натпревар за убавина, а во меѓувреме коментаторот кажуваше по некој збор за нејзините хобија и интереси. Кога ќе се земе во предвид дека се работи за ревија на Готје, сето тоа не звучи чудно или откачено.

„Тоа беше уважување кон неговата кариера и ги имаше сите негови класики“ – изјавила Лусинда Чемберс по завршувањето на шоуто. Фризурите инспирирани од 40-тите години, пирсовите и тетоважите како магија го задржаа вниманието на публиката до финалето кое се состоеше од секси долна облека во препознатливиот стил на Готје.

Џон Галијано

Брилијантниот стил што Галијано го градеше долги години ја окарактеризира и новата колекција. Бил Гајтен ги употреби сите препознатливи елементи од дизајнерскиот арсенал на Галијано – феноменален шифон, женствени сакоа и мантили, свилени фустани, свечени блескави тоалети, проѕирни сексапилни набори... Плетените коси, шапките и чевлите тип Мери Џејн го надополнија изгледот на манекенките. Инспирација за колекцијата Бил црпел од Мери Пикфорд и Мери Попинс.

Иако креациите добија пофалби, сепак критичарите не пропуштија да споменат дека на колекцијата ѝ недостигаше експертизата на Галијано.

Шанел

Шанел нурна длабоко во морето. Карл Лагерфелд приреди магично шоу инспирирано од подводниот свет. Искористувајќи нестандардни материјали кои ни сам не може да ги опише, 78-годишниот дизајнер создаде блескава нежна колекција во која манекенките изгледаа како импресивни морски суштества.

Морската пена, подводните растенија, алгите и школките го пронајдоа својот пат до креациите на Шанел, а бисерите претворени во тенки колани и сребрените чизми ѝ дадоа гламур на и така сјајната колекција.

Луј Витон

„Тоа беше прекрасна панорама од освежителни пастели. Со сите тие чисти бледи бои, беше како голема модна свадбена торта“ – изјавила Александра Шулман, коментирајќи го цветното магично шоу на модната куќа Луј Витон.

Креативниот дизајнер Марк Џејкобс со задоволство се поклони на крајот на спектакуларното шоу, оставајќи ги присутните да се прашуваат дали од наредната сезона ќе го гледаат во Диор или не.

Живанши

Темната и мрачна естетика на Рикардо Тиши уште еднаш ги освои критичарите. Исто како Сара Бартон и Карл Лагерфелд, и Тиши успешно го презентираше својот талент благодарение на инспирација од подводниот свет.

Тесни хеланки кои потсетуваат на долниот дел од одело за нуркање, заби од ајкула како приврзоци и украси на сандалите, крокодилска и змиска кожа во комбинација со пастелни нијанси на розово и крем, црно и војничко зелено ја преплавија пистата. Присутните му дадоа дополнителна гласност на аплаузот кога шоуто го финализира Жизел Бундхен.

Ели Сааб

„Color Shock“ – така Ели Сааб ја именува својата најнова колекција. И веднаш може да се забележи зошто. Колекцијата беше поделена на блокови од бои – шоуто се отвори со бисерни креации, а продолжи со нежни фустани во сенф и портокалова боја, за да заврши со темнозелени и гламурозни сини тоалети.

Како и секогаш, елеганцијата и софистицираноста се провлекуваа во креациите кои гарантирано ќе ги преплават црвените теписи во Холивуд.

Миланската недела на модата: колекции пролет/лето 2012

Неодоливи фустани со паднат струк во златна, сребрена, црна и бела боја, црни проѕирни елегантни фустани, интересни панталони со висок струк и краток „шлиц“ на ногавиците и многу златни детали... ревијата на Гучи го донесе на сцената гламурот на 20-тите години.

„Сакав да ја истражувам оптичката страна на женственоста со создавање на скулптурен гламур за жената Гучи“ – објаснила креативната директорка Фрида Џанини.

Иако доминираа црната и белата боја, златната и бојата на смарагд на елегантен начин се интегрираа во голем дел од креациите. Фрида не пропушти да си поигра и со принтовите, мешајќи црно-бели шарки на жирафа со принт на зебра.

Фенди

Хоризонталните и вертикалните линии ја преокупираа модната писта на ревијата на Фенди. Карл Лагерфелд како вистински мајстор успеа да прикаже шик начин на облекување за вистинската жена.

Тренч мантили, асиметрични сукњи, многу кошули, фустани кои потсетуваат на туники и интересни повеќеслојни горни делови со отсечени раменици го одбележаа новиот стил на жената Фенди.

Версаче

Море од гламур ја преплави модната писта на шоуто на Версаче. Нежна, елегантна и гламурозна колекција претстави Донатела Версаче, праќајќи на сцената манекенки кои наликуваа на вистински сирени со креации украсени со морски ѕвезди и коњчиња.

Тоа е имиџ на сирена „која пристигнува во Њујорк во жешка летна ноќ, подготвена да освои сè: луѓето, градот и самата себе... Жените мора да ја извадат својата агресивна страна, бидејќи сè уште треба да се пробиваат за да се истакнат во светот на мажите. Во никој случај не сум романтичарка, но чувствував дека треба да ја омекнам таа решителност“ – изјавила Донатела.

Прада

Она што може да се каже за неповторливата Мјуча Прада е дека никогаш не се плаши да стапне во непознатото и да експериментира со стандардите за убавина. Критичарите отсекогаш ја опишувале како креаторка со жед за нови идеи.

За новата колекција, Прада извади на виделина елементи како автомобили од 50-тите години, фигури од стрипови и ретро цветни дезени. Автомобилите беа главна тема на колекцијата – на креациите на кои немаше автомобили имаше апликации од чад. Сукњите беа со должина до колена и со висок струк, но кратките „блузички“ отскриваа дел од стомакот на моделите (тренд кој неспорно завладеа на пистите). Палетата на бои беше женствена: жолто, кремово, небесно сино и бордо.

Алберта Ферети

Коктел фустани со должина до под колената доминираа на ревијата на Алберта Ферети. Во секој од нив искусната креаторка имаше вметнато проѕирни ткаенини кои умерено покажуваат дел од женското тело.

Низ креациите можеа да се видат елементи инспирирани од арт деко стилот, како и од стилот на 20-тите и 60-тите години. Ферети успешно употреби поживи бои, како корална и жолта, најавувајќи разнобојна пролет.

Емпорио Армани

Отсуството на боја во повеќето од креациите на Џорџо Армани придонесе да дојдат до израз префинетоста и рафинираноста на ткаенините, кројките и изработката.

Црно-белата колекција ја фасцинира публиката со женствен современ приказ на машки стил на облекување и стилот од раните 20-ти години.

Макс Мара

Модната куќа Макс Мара се смета за бренд кој нуди безвременска елегантна облека за повозрасните жени, но новата колекција како да е обид да проникне кај младите клиенти.

Бело, ведро сино, нијанси на крем и златна боја ја окарактеризираа луксузната колекција во спортски стил.

Долче и Габана

За време на модната недела во Милано, познатото креаторско дуо ја објави веста за затворањето на нивната модна линија D&G и покажа дека ќе го задржи на фокусот својот примарен бренд.

Дневните креации беа ретро цветни и разнобојни, а вечерната облека беше украсена со многу блескави камења. „Сè потсетува на типичниот италијански весел дух“ – изјавиле прочуените дизајнери.

Роберто Кавали

Златото е актуелна тема во бизнис круговите, но и во центарот на новата колекција на Роберто Кавали. Етаблираниот дизајнер употреби злато на фустани, панталони и дури и јакни.

„Оваа колекција е химна на „Made in Italy“ и на фантазијата на италијанскиот стил. Инспирирана е од жените кои го сакаат животот и кои гледаат на него со сензуалност“ – изјавил Кавали пред почетокот на шоуто за колекцијата во која се испреплетуваат егзотичност, сексапил и мистериозност.