СВЕТСКИ РЕЛИГИИ

САМАРЈАНИ

РЕЛИГИОЗНА ГРУПА ОД 750. СЛЕДБЕНИЦИ

Самарјаните на современ начин ја чуваат древната вера

До средината на минатиот век, членовите на заедницата стапувале во брак со блиски роднини и затоа денес седум отсто од Самарјаните имаат генетски нарушувања

Вишокот момчиња значи оти некои Самарјани мораат да бараат сопруги надвор од заедницата

Древната самарјанска религија денес има 750 следбеници. И покрај малиот број оваа заедница има извонредно важна улога во Библијата и денес користи современи методи за да го зачува сопствениот начин на живот. Запознавања на интернет, невести по нарачка и предбрачните генетски тестови се нивно секојдневие. Самарјаните се обидуваат да ги испланираат следните генерации, иако бројот на девојките во нивната затворена и тесно поврзана заедница е недоволен

Отвореноста кон надворешниот свет изгледа страшна за групата, чии членови се сметаат за оригинални Израелити. Тие почитуваат строги традиции во однос на храната, сексот и Сабат. Половина од заедницата живее во модерното село Кирјат Луза на Маунт Геризим, света планина на верата во окупираниот Западен Брег, а другата половина е населена во израелскиот град Холон близу Тел Авив.

ЖЕНАТА ЖИВЕЕ ОДВОЕНО ОД СОПРУГОТ

Хусни Коен (65), еден од 12. наследни свештеници, не гледа никаква контрадикторност во сегашниот живот на заедницата, која во времето на доцното Римско царство имала милион припадници, но денес е најмалата секта на светот. Предците на Самарјаните потекнуваат од северното Израелитско царство, кое било уништено од Асиријците во 720 година пр.н.е. Нивната вера е многу слична на јудаизмот. Самарјаните се многу религиозни, но и многу модерни - вели Коен.

Одбивањето да се приспособат им создало големи маки. Пред еден век, заедницата имала едвај 146 члена. Дел од нив отишле на работа во пристанишниот град Џафа, каде што основале нова заедница. До средината на минатиот век, членовите на заедницата стапувале во брак со блиски роднини и затоа денес седум отсто од Самарјаните имаат генетски нарушувања. Генетското тестирање пред бракот помогнало процентот да се преполови. Со подобрувањето на животниот стандард, заедницата се зголемила, но вишокот мажи значи дека некои Самарјани мора да бараат сопруги надвор од заедницата.

- Немаме доволно девојки, но не можеме да им кажеме на момчињата дека не можат да се оженат. Во заедницата досега примивме околу 25 Еврејки, пет христијанки и три муслиманки. Момчињата се запознаа со нив преку интернет - открива Коен.

Самарјанската жена мора да живее одвоено од сопругот и од децата кога има мензис и да се изолира по породувањето: 40 дена ако родила син и 80 дена ако родила ќерка. Така се создава чувство на одговорност кон нашето општество. Ако девојка отстрана сака да се омажи за Самарјанин, таа мора да живее во заедницата до шест месеци за да види дали може да се вклопи. Ние ги анализираме нив, а тие не' анализираат нас - истакнува 83-годишниот свештеник Абдел Моин Садака.

ТРАДИЦИОНАЛНА ОБЛЕКА САМО ЗА САБАТ

За да покаже дека тоа функционира, Садака ја повикал својата снаа Шура, која е Украинка, да се запознае со новинарите.

- Таа поверно ја следи и почитува традицијата од повеќето Самарјани што ги знам. Во Тел Авив има канцеларија што ги охрабрува момчињата да се женат со девојки од други националности, а јас го пратив син ми таму - вели свештеникот.

Шура, 25-годишна бивша христијанка, дошла тука пред пет години од Керсон, град северно од Крим. Самарјанките се облечени во спортска облека и одат гологлави. Традиционално се облекуваат само на Сабат.Кадер Адел Коен, исто така, самарјански свештеник, веќе размислува за сопруги за своите три сина.

- Го почитувам Садака, но јас сум против венчавката со жена што не е од нашата заедница. Момчињата можат сами да си најдат невести, но моја должност е да им понудам алтернатива. Ако не сакаат да најдат девојки, сестра ми има три ќерки, а и еден мој роднина има три ќерки. Се разбира, прво ќе направиме генетски тестови - вели Кадер.Неговите синови водат типичен младешки живот. Најстариот останува до доцна во ноќта сурфајќи на интернет. Коен ги учи синовите колку е важно да се одржи и да се продолжи традицијата. Тие смеат да се оженат со која било Самарјанка, но не и со девојка од „надворешниот свет“. Ако сакаат да се оженат со девојка што не е Самарјанка, ќе се обидам да ги разубедам, но ако ми се спротивстават единствено што можам да сторам е да ги лишам од наследството - завршува Коен.

Самарјаните инсистираат девојката да премине во нивната религија, пред да се омажи, и целосно да ја почитува. Тие веруваат дека Маунт Геризим, во близина на градот Наблус на Западниот Брег, е светото место одбрано од Бога, а не Ерусалим. Тие имаат сопствена верзија на Тората, а празниците им се слични со еврејските. Тие ги почитуваат правилата за исхрана, Сабат и обрежување, запишани во нивната Тора до последна буква. Зборот Самарјанин значи „чувар на законот“. Затоа сме толку строги - вели Коен, свештеник од висок ред на оваа заедница.