Возобновување на БИГОРСКИОТ МАНАСТИР

Акатист кон Пресвета Богородица во Бигорски манастир 08.04.2011



„Радувај се единствено, најсветло Утро, кое Христа како сонце Го носиш. Живеалиште на светлината, радувај се, Ти, Која мракот го урна и мрачните бесови сосем ги одгна“
(извадок од Благодарствениот канон на Пресвета Богородица)


Денес, во петокот од петтата недела на Чесниот Пост, во умилна атмосфера, молитвено Ѝ се обративме на Пречистата наша Богородица. Нескриено беше благодатното и неизмерно радосно чувство на лицата од присутните, затоа што нивните срца го чувствуваат Нејзиното мајчинско застапништво, и затоа што Таа секогаш милостиво гледа на нас, штедро просејќи ја благодатта на Нејзиниот Син, па како да ни вели: „Не грижете се! Јас секогаш се застапувам за вас пред Мојот Син“. Торжеството на оваа несекојдневно убава богослужба беше збогатено со присуството на сестринството од манастирот во Рајчица, чиешто пеење, можеби, и најмногу Ѝ доликува на нежната Мајка на сите христијани. Службата, достоинствено и молитвено беше водена од нашиот старец, архимандритот Партениј, заедно со останатите бигорски свештеномонаси: о. Доситеј, о. Макариј и о. Јосиф. Присуството на многуте верници ја направи оваа духовна вечера на љубовта подобна на едно свечено и таинствено собрание, во коешто се слушаа само пофални песни и слова упатени кон Препрославената Богородица. А ние, охрабрени од Нејзините изобилни добрини, сега, повторно неа Ја молиме: Небесна Царице, како што некогаш, заради молитвите на Твоите верни слуги на чудесен начин си го спасила велелепниот Цариград, така и сега, милостиво и мајчински погледни на нашата страдална татковина, и како нејзина Покровителка, заштитувај ја од наездите непријателски. Смилувај се и на нас грешните и недостојни Твои чеда и удостој нѐ со покајание да ја завршиме светата Четириесетница, па да го слушнеме тропарот на Великиот Понеделник: Ете, Младоженецот, доаѓа на полноќ, та Он, наоѓајќи нé будни, на самиот крај, да нé удостои со најголемата радост - да се поклониме на Неговото славно Воскресение.








Повеќе фотографии

Изменето од Maran Ata - 09.Април.2011 во 11:37

Бигорски плени со грандиозноста

Новиот конак, изграден во духот на византиско-македонската манастирска традиција, не ги остава рамнодушни посетителите



Киро Кипроски

„СВЕТИ ЈОВАН БИГОРСКИ“ - Манастирот доби посебна убавина со изградбата на Источниот палат, кој ги поврзува Долниот со Горниот палат на Бигорски. Новиот конак, што е изграден во духот на византиско-македонската манастирска градежна традиција, не ги остава рамнодушни посетителите. Плени со својата убавина и раскош. Главниот проект го изработи архитектот Ѓурѓица Лековска, заедно со духовните чеда на Бигорскиот манастир и со Владо и Искра од архитектонското студио „Лелелеле“ од Скопје. Целиот процес, и на хартија и на дело, внимателно беше набљудуван и раководен од игуменот на Бигорски, архимандрит Партениј.

„Целото знаење што сум го стекнал во областа на архитектурата во моето дваесетгодишно манастирско искуство грижливо го применив на Источен палат, сакајќи нашата Црква да добие прекрасно манастирско здание на поновата историја. Источен палат пленува со својата архитектура, неговиот изглед и неговата изградба се во целост вдахновени од молитвите на нашите стари предци - преподобните Бигорски отци, игумените Илариот, Митрофан Арсениј и другите, кои ги поставија темелите, идеалите и стремежите, а денес тие им се остварија“, ќе констатира најзаслужниот за ренесансата што ја доживува Бигорскиот манастир во последниве 16 години откако во 1995 година дојде за старешина на манастирот архимандритот Партениј.



Источниот палат зафаќа површина од 3.600 квадратни метри, кој изобилува со разновидни простории погодни за многубројните манастирски потреби. Најголем дел од просторот зафаќаат монашките ќелии, кои се распоредени низ целиот конак. Ги има триесетина и речиси сите веќе се пополнети со монаси. Неколку простори се наменети за магацински складишта, потоа се изградени пекарница, пералница, училница, ризница за црковни предмети, котларница за парно, канцеларија и други помошни простории. Во рамките на Источен палат се наоѓа и параклис посветен на св. Никола Чудотворец, а и пространа библиотека со читалница на два ката со површина од 180 квадратни метри, во која можат да се сместат над 10.000 книги. Свој дел од површината заземаат и двата импресивни чардака, кои му даваат исклучителна убавина на целокупниот простор.

Пред да се влезе во Бигорскиот манастир, на источната страна се издига пиргот (кулата), како посебно здание, во рамките на новиот конак, која фасцинира со својот изглед и грандиозност. Висок е 15 м. Пиргот во себе вклучува 5 ката, со простории за разна намена: дело за книги за библиотека; архив за стари документи, просторија за каширање икони, просторија за сушење икони, во која се наоѓаат и осумте камбани на часовникот, кои заедно со механизмот се произведени во Белгија. На надворешниот западен и северен ѕид од оваа просторија се поставени и двата часовника со црковно-словенски бројки, во чест на славјанската традиција што ја негувал манастирот низ минатото. Тука се наоѓа и видиковец и поради тоа прозорците се отворени. Најгорната просторија на кулата, украсена со многу прозорци со тимпанони, слично на светогорските манастири, е посветена на монасите - зографи, кои ќе имаат прекрасни услови во вдахновувачки амбиент да цртаат свети икони. Кулата е ремек-дело на наши мајстори од Пустец, Мала Преспа, кои рачно го обработуваа зелениот камен што е карактеристичен за Бигорски. На кулата е самиот саат, кој го монтира пријател на манастирот од Хрватска, со механизам што се натокмува самиот по снемување електрична енергија (преку сателит), има камбани што се програмираат да ѕвонат и може да се аранжираат повеќе мелодии. Засега се програмирани две мелодии. Во 12 часот свири Тропарот на свети Јован Крстител, а во 21 часот (време за повлекување во ќелиите) камбаните го бијат кондакот „Возбраное воеводје“.

Карактеристика на Источниот палат се чардаците и фасадниот дел, кои се пандан на Долни и Горни палат. Покривот е со камени плочи. Главните дрвени греди и столбови се изработени од дабово дрво. Во изградбата на Источен палат учествуваа македонски градежни фирми, а материјалите најчесто беа подарени или, пак, набавени по цена на чинење.

Подготвителните работи започнаа во 2007 година со изградбата на потпорниот ѕид, а камен-темелникот на Источен палат беше поставен и осветен на 7 јули 2009 година, на летната слава на манастирот - Иванден. За изградбата беа потрошени минимални средства, како што истакнува отец Партениј, благодарение на фирмите што учествуваа во изградбата и посебно на носителот - градежната фирма „Жигол“, која максимално се потруди ова здание да биде изградено во рекордно време.

Во наредниот период ќе продолжат работите на зографисување на параклисот, изработка на фрески и мозаици во манастирската библиотека, а на таванот ќе има фреска на „Исус Христос - Премудруст“. „Над ранохристијанските и византиските капители од четирите столба ќе бидат насликани четворицата рамноапостолни учители и просветители - столбови за словенски народи: св. Кирил и Методиј и св. Климент и Наум охридските чудотворци. На подот ќе се изработи розета во техника интарзија, а таваните ќе бидат украсени со орнаменти инспирирани од византиската црковна уметност. Сето ова ќе се реализира во наредните години, постепено и квалитетно“, вели архимандрит Партениј.

Превземено: Утрински Весник

Изменето од Maran Ata - 17.Мај.2011 во 05:51

ВО НАВЕЧЕРИЕТО НА МАНАСТИРСКАТА СЛАВА 10.09.2011

Следејќи го примерот на првиот новозаветен испосник, ова Бигорско лозје, со љубов одгледувано и растено од својот старец, архимандрит Партениј, роди три нови фиданки, три прекрасни цвета со небесен миомирис. Обвиткани во молитва, излеана од трепетот на повеќе од илјада срца и водени од Старецот, кој ги закрилуваше со неискажлива татковска љубов, искушениците Кристијан, Зоран и Синиша пристапија во бели кошули пред светиот олтар за да примат монашки постриг. Побрзај да ми ги отвориш татковските прегратки¬ – возгласи нашиот духовен татко, предавајќи ги своите чеда во жива жртва на Господа и на Неговиот Крстител. Возвишениот чин на монашки потстриг беше извршен од нашиот надлежен архијереј, митрополитот Дебарско-кичевски и Плаошки, г. Тимотеј, пред кого тројцата нови отци ги положија монашките завети. Христофор, Захариј и Евфросиниј се тројцата нови ангели во тело, новите молитвеници за нашиот христољубив народ. „Сакаме испоснички живот, Високопреосвештени владико!“ – одекнаа во еден глас овие силни зборови од срцата и устите на новите монаси. „Едни Му принесуваат на Бога сребро и злато, други нежни свилени ткаенини, а трети излеваат чисти капки солзи – некои, пак, сами себеси се принесуваат, во жртва непорочна пред Христа“ – вели св. Григориј Богослов. Какава огромна радост е тоа за нашите срца, но кој може и да претпостави какво ли е торжеството денес на набесата! Се радуваат ангелите, се радуваат преподобните и богоносни отци, се радува и заштитникот на монасите – св. Јован Крстител!





По завршувањето на вечерната богослужба, празничното ликување беше збогатено со полчасовен концерт на класична музика, a потоа настапи моментот за премиера на документарниот филм „Метох“ во изработка на режисерот Стојан Вујичиќ, продуцентот Огнен Антов и камерманот Емил Јовановски. „Метох“ е, навистина, прекрасна реализација на филмското платно, чијашто содржина е животот на монахињите од манастирот „Св. вмч. Георгиј Победоносец“ од Рајчица, метох на Бигорскиот манастир.





Проекцијата на „Метох“ се одвиваше под отворено небо, во манастирскиот двор, непосредно до Горни Палат, во присуство на илјадниците верници. Меѓу гостите беа и неколку претставници на власта, љубители и помагачи на Бигорскиот манастир: г. Мартин Протогер – шеф на кабинетот на Премиерот на РМ, г. Кире Божиновски – генерален секретар на Владата на РМ, г. Влатко Ѓорчев – пратеник, г. Илија Димовски – пратеник и порф. д-р Васко Наумовски – екс-вицепремиер.

ПОВЕЌЕ ИНФОРМАЦИИ, ФОТОГРАФИИ И ВИДЕО СНИМКИ

Изменето од Maran Ata - 12.Септември.2011 во 02:40

Врачена наградата 4-ти Ноември на архимандрит Партениј



Во прекрасна празнична атмосфера и радосно расположение на неколкуте стотици битолчани во преполнетата сала на Битолскиот театар, вчера, на 4ти Ноември – Денот на ослободувањето на Битола, беше одржана свечена прослава, на која Општина Битола ги додели Четвртоноемвриските награди и признанија. Највисоката награда - наградата за животно дело му припадна на нашиот старец, архимандрит Партениј, затоа што тој како духовен татко им помага на голем број млади луѓе, западнати во пороците на денешнината. Вадејќи ги од длабочините на погибелта, старец Партениј со огромна љубов и пожртвуваност повторно ги насочува младите души на Христовиот спасителен пат. Доделувањето на наградата беше проследено со долготрајно и громогласно ракоплескање од присустните, меѓу кои имаше и мноштво духовни чеда, кои љубовта ги поттикна да дојдат и да му искажат благодарност и почит на нивниот возљубен духовен татко. Израз на таа сеприсутна љубов беше мигот кога старецот беше буквално опсипан со бројни цвеќиња и букети.

Повеќе фотографии, информаци и видео клипови на официјалната веб страна на Бигорски манастир

Еордија во Струга 07.05.2012

Еве трета година откако се обнови во полн сјај прекрасната струшка традиција, т.е празничната еордија, воспоставена уште пред неколку века, според која после ктиторската вечерна, на која им се оддава чест на ктиторите на црквата и големите духовни водачи на Струга, побожните стружани излегуваат на свечена литија низ градот, носејќи ја чудотворната икона на св. Георгиј. Овие три години Струга ја доживеа радоста да ги пречека, да им биде домаќин на светите мошти на Великомаченикот од манастирот во Рајчица и да се насладува од благодатта и чудесното благоухание кое неискажливо се шири од мироточивите мошти и им носи голем благослов на жителите од овој славен град. И како што полека меѓу побожните граѓани се ширеше веста за моштите, така секоја година сè повеќе се зголемуваше бројот на оние кои сакаа да го споделат торжеството на литијата. Но дури и ние бевме изненадени од она што се случуваше денес во градот на мостовите. Струга воскресна во вистинска смисла на зборот. Улиците беа навистина претесни за онаа огромна толпа народ, која со озарени лица и воскресна радост ги следеше моштите, а не мал беше и бројот на оние што стоеја од обете страни и со голема почит се поклонуваа на иконата и моштите. И секако тука беа и најмалите со своите празнични знаменца и кошници полни цвеќе. Чиниш за миг застана она гратско секојдневие и сè се претвори во едно непрестано славословие кон Милостивиот Бог и Неговиот славен светија, поборникот на православните.





ПОВЕЌЕ ФОТОГРАФИИ И ВИДЕО

Изменето од Maran Ata - 09.Мај.2012 во 11:37