Што да подарите за празниците...

Бидете едноставни и креативни

Доколку сте го купиле совршениот подарок за најблиските тогаш најдобро ќе биде да одвоите малку време и во подарокот да вметнете нешто свое и уникатно. Како да го направите тоа? Најлесен начин е сами да го завиткате. Виткањето и украсувањето на подароците е потег со кој ќе покажете внимание, а и со кој вашиот подарок ќе биде запаметен и уникатен. Еве  неколку креативни идеи:

Едноставноста е најдобар избор
Понекогаш едноставно завитканиот подарок е најдобриот избор. Натрупано завитканите подароци понекогаш може да ја убијат топлината и уникатноста која сте ја дале при украсувањето. Затоа најдобро е да одберете еднобојна хартија (омилената боја на личноста за која е наменет подарокот), а најдобар избор би бил рециклираната хартија. Само ослободете ја фантазијата за да постигнете најдобар ефект од наједноставните материјали.

Посветете внимание на деталите
Бидејќи ве советувавме хартијата да е еднобојна препорачуваме на подарокот да ставите и некаков детаљ. На овој начин украсувањето нема да изгледа сиромашно, туку ќе има поголем ефект, а ќе дојде до израз и вашата креативност. Можете да направите различни форми од хартија, како, на пример, голема ѕвезда или снегулка. Можете да употребите и некои растенија како рузмарин, зависно од вашата замисла. Исто така, препорачливи се и копчињата или беџовите.

Употребувајте различни материјали
На крајот, употребете различни материјали во различни бои. Меките материјали асоцираат на топлина и нежност. Направете тенки ленти и заврзете ги околу подарокот. За оваа намена користете или волница или некоја украсна лента (која можете да ја купите или направите од некои стари алишта), а се препорачуваат и свилените ленти.