Со Аугенталер ќе стигнат и германски спонзори

Ако Клаус Аугенталер биде избран за селектор на македонската фудбалска репрезентација, тој ќе донесе германски спонзори, факт што го прави најсериозен кандидат за оваа функција. Денеска или утре, претседателот на ФФМ Хари Хаџи - Ристески и генералниот секретар Игор Климпер ќе заминат за Нирнберг, каде што ќе преговараат со Аугенталер.
Како што дознаваме, ако се договорат со Германецот, кој интерес за селекторското место покажал уште пред еден месец, тогаш, покрај ФФМ, во неговото финансирање со одреден процент би учествувале и спонзорите од Германија, што тој евентуално би ги донел. Исто така, во договорот помеѓу Аугенталер и ФФМ би била вметната клаузула, тој да биде добро награден во случај македонската репрезентација со него да избори учество во баражот за Мундијалот 2014, односно би добил најмалку милион евра. Можеби, најсигурен извор од кој Германецот би се плаќал би биле телевизиските права. Пред се, ако Аугенталер посредува во договорањето на пријателски меч со Германија, од чии телевизиски права ФФМ би инкасирала близу два милиони евра, процент би земал и тој. На сличен начин, Азербејџан го плаќа нејзиниот селектор Берти Фогтс, кој му ја донесе германската репрезентација како спаринг-партнер.
Инаку, Клаус Аугенталер е поранешен првотимец на Баерн Минхен и германски репрезентативец. Тој му беше асистент на Џовани Трапатони во Баерн, потоа и тренер на оваа екипа, а беше и на клупата на Нирнберг, Баер, Волфзбург, Унтерахинг...
Што се однесува до Хрватот Мирослав Ќиро Блажевиќ, кој, исто така, е кандидат за оваа функција, во договорот што го имаше со Федерацијата на Босна и Херцеговина стоеше клаузула тој да добие екстрапремија ако ја пласира нејзината репрезентација во баражот за СП 2010. Тој успеа и требаше да инкасира милион евра. Хари претстојниве денови телефонски ќе разговара и со него

Го поправивме ФИФА-ранкингот и без победа

Џон Тошак нов селектор

Велшанецот Џон Тошак од вчера е новиот селектор на македонската фудбалска репрезентација и ќе дебитира против Русија на 2 септември, откако викендов успеа да се договори со раководството на ФФМ околу условите од договорот. Селекторската позицијата беше испразнета повеќе од еден месец по отказот што го доби Мирсад Јонуз.
- Џон Тошак ги прифати условите што ги понудивме во рамките на предвидениот буџет на федерацијата и на зедничко задоволство се договоривме да ја предводи нашата селекција во следниот квалификациски циклус за СП во Бразил - изјави претседателот на ФФМ Хари Хаџи-Ристески за интернет-сајтот на ФФМ.
Шеесет и двегодишниот стратег во својата богата кариера, меѓу другите, ги водеше Реал Мадрид, Спортинг и Депортиво, а последен ангажман му беше селекторскиот во Велс (2004-2010).
- Навистина ми е чест што сум одбран за селектор на македонската фудбалска репрезентација. Луѓето од раководството на ФФМ беа прекрасни, отворени, и тоа ми дава надеж дека заедно можеме да постигнеме успех на репрезентативен план. Максимално ќе ги искористиме следните квалификациски средби за да што подобро се подготвиме за предизвикот кој се вика Бразил 2014. За групата не би говорел многу. Првиот впечаток е дека се работи за тешка, но доста израмнета група. Што се однесува до "мојот" Велс, сигурно дека е тешко да се игра против "своите", но барем засега не сум размислувал како ќе го прифатат тоа навивачите на Велс. Јас сум професионалец и размислувам само во тој правец - изјави новиот селектор на Македонија.
Тошак ќе пристигне во Македонија на 25 Август а официјалната промоција ќе биде ден подоцна.

Бабунски му сервира нов состав на Тошак

По серијата слаби резултати во квалификациите, македонската фудбалска репрезентација, конечно, успеа да победи, и тоа на гости. Совладан е стариот муштерија, репрезентација на Азербејџан, со 1:0, но што е најважно, в.д. селекторот Бобан Бабунски му сервира на новиот репрезентативен учител, Велшанецот Џон Тошак, нов состав со дури петмина дебитанти. Во победата над Азербејџан учествуваа дебитантите Стефан Ристовски, Александар Трајовски, Стефан Спировски, Самир Фазли и Владимир Димитровски, како и повратниците Влатко Гроздановски и Томе Пачовски. Со отсутните Митрески, Новески и Лазевски, во следните квалификациски циклус за Мундијалот во БразилТошак ќе има можност да состави тим кој би бил спој на искусни и на млади фудбалери.
По победата, селекторот Бобан Бабунски беше задоволен не само од резултатот туку и од играта, особено во второто полувреме .
- Задоволен сум од нашето издание, особено во второто полувреме. Азербејџан беше многу поагресивен во првиот дел, но во вториот, квалитетот дојде до израз и мислам дека имавме многу позрели шанси, дури и за поубедлива победа. По овој триумф, се врати атмосферата во тимот во вистинско време. Сигурно дека Тошак го гледал натпреварот и го анализирал. Јас сум тука за да му помогнам од секој аспект, особено ако бара информации за играчите - изјави Бабунски.
Селекторот на Азербејџан, Германецот Берти Фогтс, не го прифати лесно поразот.
- Не заслуживме да загубиме, особено со играта што ја прикажавме во првото полувреме. Во вториот дел бевме надиграни. Не знам дали ова е најправедниот резултат, но фудбалот се игра за резултат - рече Фогтс.
Што се однесува до мечот во Баку, македонската репрезентација во една просечна игра подобро се снајде на теренот со пластична трева на новоизградениот стадион "Далга арена". Во првото полувреме, Азербејџан повеќе ја имаше топката во свој посед, притискаше кон голот на Пачовски, а Македонија чекаше шанса да се закани од противнапад. Во вториот дел, македонскиот национален тим се прикажа во многу подобро издание. Во 56. минута, Тричковски шутираше од 18 метри, но домашниот голман одбрани, а две минути подоцна Пандев и донесе водство на Македонија со својот 24. гол во репрезентативниот дрес.
Ова беше последната проверка на нашата фудбалска репрезентација пред следниот дуел, кој ќе го играме во квалификациите за пласман на ЕП 2012 против Русија. Средбата со "зборнаја" ќе се одигра на 2 септември во Москва, каде што на кормилото на нашиот национален тим ќе дебитира новиот селектор Џон Тошак.

Македонија утрово лета за Москва

Нашата фудбалска репрезентација в петок на стадионот „Лужники“ против Русија во квалификациите за ЕП 2012

Сашко Ѓ. Димовски

Откако вчера го одржа првиот тренинг во комплетен состав по доаѓањето на Иван Тричковски од Кипар, македонската фудбалска репрезентација утрово отпатува во Москва каде што в петок на стадионот „Лужники“ ќе и' гостува на Русија во квалификациите за Европското првенство во Полска и во Украина в година.

Пристигнувањето на играчите во групи претставува проблем за новиот селектор на Македонија, Џон Тошак. Но, од друга страна, пак, Велшанецот потенцира дека е пријатно задоволен, бидејќи првпат во селекторската кариера му доаѓаат сите фудбалери што ги повикал. Признава дека се' уште нема јасна слика за формата со која доаѓаат играчите и со нивните можности. Сепак, и покрај топлото време, тој нема забелешки за односот и залагањето на репрезентативците на работните сесии.

„Иако е невозможно да се добие вистинската слика по само три тренинзи, сепак, мозаикот полека се комплетира. Во основа, се' уште се водам од она што досега имав можност да го видам на снимки. Тренинзи се едно, а натпревари, сепак, нешто сосема друго. Имам впечаток дека може да составиме добар тим за дуелот со Русија“, вели Тошак, кој синоќа требаше да реши кои 19 играчи ќе ги поведе на пат кон руската престолнина.

Опасност од втор жолт картон во дуелот со Русите, што автоматски ќе значи пауза за Андора виси над пет македонски репрезентативци. Меѓу нив и капитенот Горан Пандев, новото засилување на Наполи, а во таква ситуација се уште и Ванче Шиков, Горан Попов, Николче Новески и Мухамед Демири.

„Русите имаат силем тим и мечот против Македонија сигурно е многу важен за нив. Свесни сме што не' очекува на ’Лужники‘ в петок. Располагам со многу вести за противникот против кој имам настапи како фудбалер, но и како селектор на Велс. Ќе бидеме максимално подготвени за претстојниот предизвик“, изјави Тошак.