Поддршка за А1 Телевизија?

 

Стечај за А1, 230-те вработени на улица, по автоматизам ќе добијат отказни решенија. Неизвесно е само дали телевизијата ќе продолжи да емитува програма.

“Може да се задржат одреден број вработени со одобрение на судот за одредени неодложни работи, меѓутоа јас се уште го немам решението. Тие што ја даваат дозволата ќе кажат дали се уште важи. СРД тоа што го кажа е нивна работа, но член 62 е јасен дали дозволата ќе важи, јас би требало само да добијам информации”, вели Ацо Петров, в.д. стечаен управник.

Советот за радиодифузија утре со официјален став – дали ќе ја одземе фрекфенцијата и дозволата за работа како што налага Законот. Најверојатно ќе ја чека разврската од стечајната постапка која може да заврши и со реорганизација, рестартирање или продажба со преземање на долговите, а во меѓувреме ќе тактизира и судското решение нема да го става како точка на дневен ред. Барем така најави претседателот на регулаторното тело за кого Законот бил несреќно срочен - во членот 62 стои дека “дозволата престанува да важи при стечај или ликвидација”. Зоран Стефановски пак смета дека требало да стои “стечај со ликвидација”.

Стечајната постапка беше отворена откако Судот констатира дека сите законски услови се исполнети - повеќе од 45 дена блокирана сметка на којашто има само 900 000 евра, недоволно за намирување на обврските од речиси 30 милиони евра заведени во извештајот на привремениот стечаен управник. Само нешто помалку од една третина или 9 милиони евра се побарување од УЈП, комбинација од неплатен ДДВ, данок на добивка, персонален данок на доход, придонеси и камати, остатокот е кон други доверители. Неизвесно е колкав дел ќе биде намирен бидејќи зградата на Перо Наков и најголемиот дел од автомобилите и другиот движен имот повеќе од две години се под хипотека за кредит во НЛБ Тутунска банка. Телевизијата има и побарувања од 16 милиони евра во најголем дел кон поврзани правни субјекти, што е и главна причина за лошата финансиска кондиција.

Адвокатите на А1 бараа покрај веќе изготвениот извештај на привремениот стечаен управник и вешто лице да направи увид во финансиското работење, а да биде земено предвид и вештачењето во “Пајажина” бидејќи, според нив, сумите што ги побарува УЈП во двата одвоени процеса не се поклопувале.

“Коректно беше денешното судење, сепак ќе вложиме жалба бидејќи некои од нашите докази не беа земени предвид”, изјави Виолета Дума, адвокат.

Жалење за стечајот и надеж дека тој нема да доведе до згаснување на телевизијата изразија Здружението на новинари и Синдикатот на медиумски работници.

“Македонскиот медиумски простор би бил сериозно осиромашен со затворањето на најстарата приватна телевизија” се вели во заедничкото соопштение.

 

Еми ако толку ги жалите, ај соберете неколку милиони еврони и платате им ги долговите. Затоа е стечај, сега некој ќе ја купи многу поефтино од она што вреди. Уз пут може и за кауција на Вељија да соберете, да не скапува така паметен, способен и образован.