Морковите варете ги!

Познато е дека со готвењето зеленчукот губи дел од драгоцените состојки. Единствено, морковите се исклучок. Нутриционистите открија дека со варењето на морковите, количеството на бетакаротен и на фолната киселина, важни елементи за организмот, се зголемува за една третина. Овие состојки го штитат здравјето од слободните радикали кои го разоруваат телото и го слабеат имунолошкиот систем.

Лешници за здрав желудник

Во поголемо количество содржат витамин Б1 кој ги јакне нервите, витамин Б3 кој ги одржува здрави желудникот и цревата, витамин Б6 кој е важен за измена на белковините, витамин Е кој ги штити клетките од дегенеративни промени и фолна киселина која помага за создавање на црвени крвни зрнца. Од минералите содржи големо количество на калциум кој е важен за создавање на коските.

8 златни правила во исхраната

1. Наместо путер, свинска маст и павлака, во храната додадете маслиново масло.
2. Секојдневно изедете најмногу 10 мл масло од житарки, најдобро во салати.
3. Внесувајте го разумно дневното препорачано количество на маснотии: една мала порција торта со слатка павлака содржи исто или дури и повеќе заситени масни киселини како и една голема порција месо кое побрзо заситува, а содржи и други хранливи состојки (белковини, железо).
4. Јадете сирење два до три пати неделно. На постарите лица им се препорачуваат само мали количества на млечни производи. Ако имате зголемен холестерол, тогаш јадете исклучиво немасни видови на сирење, но многу ретко.
5. Предност дајте му на белото месо пред црвеното, зашто содржи помалку заситени масни киселини.
6. Јадете многу риба, барем два до три пати неделно, зашто рибата е богат извор на омега-3 масните киселини, а не содржи многу заситени масни киселини.
7. Јадете мали количества на салами: ако изедете само пет до шест грама салама, тогаш тоа уживање можете да си го овозможите речиси секојдневно. Ако, пак, не можете да им одолеете на саламите, тогаш обидете се да ги јадете оние кои се помалку масни. Не јадете сланина.
8. Секогаш отстранувајте ја целата видлива маснотија од месото, шунката, пршутата

Конзумирање на јагоди го забавува стареењето, па дури и штити од рак, покажува истражувањето на шпански и италијански научници.

Според нив, јагодите помагаат за зголемување на нивото на антиоксидансите во крвта што го спречува т.н. окислителен стрес, го забавува стареењето, па дури и го намалува ризикот од болести како рак, дијабетис и срцеви болести.

За целите на експериментот научниците им давале по половина килограм јагоди на 12 здрави доброволци во текот на две недели. Тие потоа зеле примероци од крвта од четвртиот, осмиот, дванаесеттиот и шеснаесеттиот ден, како и еден месец подоцна. Резултатите покажале дека редовното конзумирање на јагоди го зголемува нивото на антиоксиданси во крвта и го спречува распаѓањето на црвените крвни клетки.

Научниците од Политехничкиот универзитет во Марке, Италија, и од Универзитетот во Гранада, Шпанија, сметаат дека тоа се должи на високото ниво на фенолни состојки, кои имаат антиоксидантни својства.

Овошјето е природен десерт, кој за разлика од колачите и другите слатки задоволства, може да ни биде единствено од неизмерна корист, без пропратни штетни влијанија.

Во летниот период, кога сме постојано изложени на сонце, потребни ни се одредени витамини и хранливи материи кои ќе ја подготват кожата за влијанието на силните сончеви зраци. За таа цел, природата токму во овој период од годината ни нуди природно и вкусно решение.

Во продолжение ви го претставуваме овошјето кое треба поинтензивно да го консумирате во летните денови, особено кога се подготвувате да одите на одмор.

Кајсии

Сезона: Од јули до август

Благодарение на провитаминот А со кој се богати кајсиите (од 1,5 до 3 милиграми), ова овошје ја штити кожата и ја подготвува за сончање. Исто така, кајсиите се корисни и за видот. Богати се и со калиум, кој помага кај високиот крвен притисок и го подобрува спиењето.

Калории: 35 kcal/100g

Кајсиите не ги бирајте по црвената боја, која не е знак за зрелост, туку по нивната мекост и силниот мирис.

Праски

Сезона: јули и август

Покрај нивната корист за кожата, праските се богати и со флавоноиди, кои ги штитат крвните садови. Исто така, праските воспоставуваат рамнотежа во однос на киселините од останатите намирници кои ги внесуваме во организмот. Имајте во предвид дека жолтите врсти се побогати со витамин Ц од белите врсти.

Калории: 40 kcal/100g

Бирајте ги оние плодови кои се меки на допир затоа што праските не созреваат после бербата. Жолтите врсти се покисели од белите. Црвенкастите, пак, се познати по добриот вкус.

За кожата и сончањето добри се и дињите кои се богати со бетакаротен, како и доматите кои се богати со ликопен.

ДИЊИ

Го јакнат и го чистат организмот

Дињите содржат многу вода, потоа околу 7 отсто шеќер, 1 отсто белковини, нешто помалку влакна. Од витамините, во нив има многу каротин и витамин Ц, а од минералите главно калиум.
И дињите имаат благотворно дејство врз бубрезите и жолчната ќеса, зашто ги олеснуваат тегобите кај акутното воспаление. Исто така, го јакнат и го чистат организмот. Бета-каротенот има превентивна улога кај некои видови рак.
Додека лубениците освојуваат со сласта, дињите тоа го прават со вкусот и аромата. Не е случајна поговорката: "Да знае свињата што е диња, не би јадела тиква".
Има зелени и портокалови дињи, но и едните и другите се подеднакво сочни, слатки и нискокалорични - во 100 грама има само 29 ккал.

Против камен во бубрезите и бешиката

За овој лек ви се потребни еден килограм семки од диња кои се ставаат во пет литри вода и се варат додека течноста не спадне на три литри. Откако ќе се излади, се прецедува и се сипа во шишиња. Од течноста се пие три пати дневно по 100 мл. Лекувањето трае додека не исчезнат тешкотиите. Овој лек може да се подготвува и секој ден и да се консумира свеж. Тогаш се земаат една лажица семки, се толчат и се варат 2-3 минути во 200 мл вода. Се пие три пати дневно.

Против каснувања и изгореници

Дињата ги смирува и ги ублажува болките кај надворешните повреди на кожата при каснување и изгореници. Болното место се мачка или со сок од диња или на него се ставаат облоги од рендана диња.

Праските даваат енергија

Поради специфичниот пријатен вкус, сочноста и хранливите вредности, праската се вбројува во најомиленото овошје. Најдобро е да се јадат свежи.
Во месото на праската има целулоза (растителни влакна), која претставува 1,4 отсто од нејзината тежина, натопена со сок, т.е. со вода со стопен шеќер, мало количество на јагленохидрати, 12-ина минерални соли (од кои најмногу има калиум) и со витамините А и ПП.
Зрелата праска содржи 12 отсто јагленохидрати, шеќер 0,5 отсто, потоа белковини и малку масти. А, 100 грама месо од праската даваат 52 калории.
Во праската има витамин Ц, каротин - провитамин А, витамин Б1, витамин Б2, ПП и други. Пред се, витамините се концентрирани во лушпата на праската, па затоа треба да се јадат нелупени.
Свежата праска најмногу има калиум, потоа калциум, фосфор, магнезиум, сулфур и натриум.
И праската е мошне корисна за здравјето на човекот: ги ослободува цревата од отровите, ги смирува нервите кај децата, го поттикнува лачењето на жолчката, го закрепнува црниот дроб, ги освежува желудочните органи, ги јакне белите дробови.
Како што на реконвалесцентите им се даваат портокали, така може да им се даваат и праски, зашто лесно се варат и даваат енергија. Тие се одлична храна за децата, идните мајки и за постарите лица.

Сок од праски

За сок изберете целосно зрели плодови. Измијте ги, извадете им ги семките и добро изгмечете ги. Потоа, на секој килограм овошје додадете еден литар варена вода во која сте раствориле 20 грама винска или лимонска киселина и 20 грама исушена мајчина душица. Оставете ги на ладно место да отстојат 24 часа. Потоа, сокот прецедете го. На секој литар сок додадете еден и половина килограм шеќер и оставете го да отстои на ладно место два дена, со повремено мешање. Готовиот сок сипајте го во шишиња и затворете го со двојно превиткана газа.

Мармалад

Земете еден килограм зрели праски и петстотини грама шеќер. Праските измијте ги, а потоа испасирајте ги или исечете ги на помали парчиња, па посипете ги со шеќерот и поклопени оставете ги да отстојат два-три часа. Потоа, на јак оган варете ги 30-ина минути. Врелиот мармалад сипајте го во загреани тегли и затворете ги со целофан.