Дневник - во малку поинаква форма...

ЧЕКАЊЕ ...

Те вдишувам и издишувам,

Како причина, како потреба,

Осмели се и наречи го навика,

Моето дишење во замена за она што си ти.

Неконтролирано, скоро избезумено,

Мисла која повторува една иста црта,

Како да слика и пресликува еден ист лик,

Сон или сениште, јас го нарекувам љубов.

Закопан предизвик под ѓубрето на вистината,

Како депонија на желби и копнежи,

Човечки и приземни наречени грев,

А јас одамна ги презирам милостивите светици.

И кој – кого довикува и мами,

Едниот со затворени очи а другиот во светлина,

И двајцата во расчекор тргнати еден кон друг.

Двајца за танго и црвен фустан на свилена кожа,

Допир на раце без ветувања за бакнеж,

Со лоша музика во позадина за губење ритам...

РАЗЛИКА ....

Одбери,

Фатаморгана на среќа во песок претворена,

Жедна и бедна пустина на душа бездушнику,

Па изгради замок со сопствени раце без капка вода,

И моли го ветерот никогаш да не помине покрај него.

Одбрав,

Тага распослана која не ја заборава душата,

Ја одмива со солено  море собирани солзи,

Бисери нанижани на грлото како стражари,

Граничари кои  ги враќаат назад во изворот.

Остани,

На врело сонце со копнеж за дождливи ноќи,

Од див оган во пепел претвори се,

Да се помешаш во заматено сивило со неколку капки,

Па да се сокриеш и да станеш невидлив.

Заминав,

По патот на талкачите за почасно место,

На огадени тротоари и смрдливи мостови,

За раскошна прекривка од сино небо,

И две раце широко отворени и празни.

“Благородни”

Плукни и светни си го поубаво оклопот сјаен,

За туѓи воздишки и мојот одраз во него,

Како сочувана слика во рамка од сребро,

Заледено време отидено во неповрат ....

Се насмеав како на искривено огледало,

Еднаш ќе го видиш за да му се потсмеваш цел живот,

На сопствениот одраз со благородна насмевка,

Онаа цинична, искривена а толку посакувана.

Загноени рани кои смрдат на гадост,

Прекриени со свилена кошула со извезена желба,

И црвен тефтер со цртички на неписменост,

Зар некој ја брои колатералната штета?

Гордоста нема цена ниту лик за титула закачена,

Па може лесно да се изгуби како златник во искинат џеб,

А просјачењето е забрането со закон непишан,

Еднаш кажан , ветен и запомнет засекогаш....

Прескокни ме со лажна к*ртоазија,

Благородна и човечка  како Дарвинов сведок,

Па голтни и подголтни со суво грло,

Жедно за вино со вкус на јагоди во пролет....

Не сонувам  за акварели од помешани бои,

Без ред и крај за бујна фантазија,

Па да можам  во нив да видам одсликана желба,

Која не сум смеела да ја изговорам гласно ...

Сонувам за остри црти, одлучни и јасни,

Кои го расечуваат платното храбро,

Па белото го претвараат во црнила од линии,

Од кои ти доаѓа да плачеш .....

И никој несака да ги види, да подзастане,

Уплашени погледи и изговори за излез,

Како будење од детски кошмар

И добро позната реченица како утеха:

Се ова е само сон, помина и заврши ....

Јас несакам да побегнам од темнината на моето платно,

И со љубов ќе продолжам да го гледам,

Со уште поголема љубов ќе сечам парчиња од него,

Ќе ги залепам длабоко во душата ....

Едно покрај друго за да биде зачувано засекогаш .....

Кој може да ја разбере,

Кога плаче и проколнува,блуднички  се соблекува,

Кога кошулата и паѓа и останува разголена пред тебе,

Заслепувачка бела светлина која несакаш да ја гледаш ....

Кој може да ја разбере,

Кога се смее на цел глас и трча босонога,

Палаво те мами и те довикува да ја дофатиш,

И пак бега и се крие по темници за тебе непознати ....

Кој може да ја разбере,

Кога црвенее и се бунтува, вика и навредува,

Дивее како оган разгорен на суво поле со летен ветер,

Гори и пеплосува со истиот жар со кој умее да љуби ....

Кога седи со часови на подот во аголот на собата,

Безживотно, без  да се помрдне и трепне,

Кревањето на градите ја оддава – да, жива е ....

И зошто е битно дали некој ја разбира,

Таа е и жена, и дете и мајка .....

Издраснала, се преродила и родила,

Љубов во болка никната за да биде запаметена,

Украс како златен синџир на стар часовник,

Времето ќе продолжи да се врти во круг заедно со неа ....