Вести

ШТО СЕ СЛУЧУВАЛО ПО ВРАЌАЊЕТО НА ФУДБАЛЕРИТЕ НА РЕАЛ МАДРИД ОД ЛА КОРУЊА?

Мурињо нападнат или телохранителот сам се изгребал

Враќањето на фудбалерите на Реал Мадрид од Ла Коруња последниве денови ги полни страниците на светскиот печат поради наводниот напад врз нивниот тренер Жозе Мурињо на тамошниот аеродром. Според пишувањето на Б-Би-Си, бил повреден еден од телохранителите на Мурињо, кој се здобил со убодна рана длабока четири сантиметри. Телохранителот, именуван само како Едуардо, почувствувал дека е повреден откако се качил со Португалецот во автобусот. Според оваа англиска ТВ-станица, нејасно е дали Мурињо воопшто знаел што точно се случило бидејќи шпанските медиуми известуваат дека челниците на Реал дури вчера му ги кажале деталите за инцидентот. Целата случка била снимена од сигурносните камери на аеродромот, а напаѓачот, опишан само како висок човек, веќе бил уапсен.
Од Реал Мадрид вчера ги отфрлија медиумските шпекулации дека тренерот Жозе Мурињо бил нападнат со нож.
- Баш ништо не се случи - тврди портпаролот на Реал и додава:
- Атмосферата во Ла Коруња беше многу опуштена, Мурињо им пријде на навивачите за да им подели автограми, а потоа се врати во автобусот. Во хотелската соба еден од обезбедувачите забележа дека има гребаница на грбот. Истата можел да си ја направи чешајќи се со нокот или, пак, кога се потпирал на оградата. Да се случеше нешто сериозно, веднаш ќе се обратевме во полиција. Не може да се случи некој да се обиде да го нападне нашиот тренер, а ние ништо да не сториме.

Димитровски најдобар спортист во Млада Болеслав

Македонскиот фудбалски интернационалец во Чешка, Владимир Димитровски, по само една година помината во дресот на Млада Болеслав, веќе се здоби со првото признание. Во изборот, кој го направиле читателите на најтиражниот локален весник, популарниот Дади добил најмногу гласови во категоријата најдобар спортист во Млада Болеслав за 2010 година.
- Да бидам искрен, навистина ме изненади изборот на читателите од Млада Болеслав. Не очекував дека сум толку популарен во овој чешки град, кој брои близу 60.000 жители. Признанието добива на тежина затоа што е остварено во конк*ренција на уште неколку популарни хокеари и кошаркари. Сега кога знам дека публиката високо ме цени и почитува, тоа ми е дополнителна инспирација да пружам уште поквалитетни игри - ни рече Димитровски.
Дади беше стандарден во тимот на Млада Болеслав во првите две пролетни кола. Во последното коло ги вкрсти копјата со Владица Брдаровски од Брно, а денес требаше да настапи против Бањик на Глигор Глигоров, но поради ситна повреда не отпатува во Острава.

Македонија вреди 34.700.000 евра

Македонската фудбалска репрезентација во моментов се наоќа на 33. место на најскапи национални тимови во Европа. Вкупно, "црвено-жолтите" се проценети на 34.700.000 евра, од кои најголем дел отпаѓаат на најдобриот македонски фудбалер Горан Пандев (13.500.000). Следуваат Горан Попов, кој вреди два и пол милиони евра и Николче Новески со 250.000 евра помалку.
Зад на листата, составена од интернет-сајтот "Трансфермаркт", меѓу другите, се Бугарија, Финска, Албанија, Грузија и Кипар.
Очекувано, убедливо на врвот е актуелниот европски и светски првак Шпанија со 606 милиони евра, пред Англија (424), Франција (382), Германија (360) и Португалија (332). Од регионот, највисоко котира Србија, која е осма (202), а блиску е 11-топласираната Хрватска (155).

Раниери го одбил Спартак

Донеодамнешниот тренер на Рома, Клаудио Раниери, го одбил повикот од Москва да го превземе тимот на Спартак кој неодамна остана без тренер бидејќи Валериј Карпин поднесе оставка.

Искусниот италијански стратег изјавил дека во овој момент го интересираат исклучиво понуди од Англија и дека нема намера да работи во некоја друга земја.

Бекам неповреден во сообраќајка

Англискиот фудбалер Дејвид Бекам и неговиот син Бруклин доживеаја сообраќајна несреќа, но минаа само со полесни повреди, соопшти полицијата во Лос Анџелес. Поранешниот капитен на "Гордиот Албион", возејќи го својот голем "ес-ју-ви" автомобил од марката "Кадилак ескалејд" удри со задниот дел на златниот "Мицубиши" на автопатот 405 во Калифорнија.
Од силината на ударот, 40-годишниот возач на "Мицибушито" задобил повреда на вратот, па е превезен во болница, но таму не е констатиран потежок степен на повреда, туку само истегнување.

Против славниот фудбалер не е покрената постапка поради судирот, ниту е приведен во полициска станица.

Бекам, кој играше за Манчестер Јунајтед и Реал (М), пред да потпише за ЛА Галакси, беше капитен на Англија од 2000 до 2006 г.
Пред десетина дена тој со сопругата Викторија беа гости на кралската венчавка на принцот Вилијам и Кејт Мидлтон.

Бускетс ќе игра во финалето од Лигата на Шампионите

Првотимецот на Барселона, Серхио Бускетс ќе може да настапи во финалето од Лигата на Шампионите, бидејќи Дисциплинската комисија при УЕФА ја одби жалбата на Реал Мадрид поради неговото наводно расистичко однесување. Реал во УЕФА поднесе тужба против Бускетс, тврдејќи дека играчот на Барселона го нарекол Марсело "мајмун", што се гледа и на видео снимката, па останува нејасно зошто УЕФА ја отфрлила жалбата, со тврдење дека не постојат доволно докази за суспензија.

Одредени градовите домаќини на ЕВРО 2016 во Франција

Федералниот совет на Француската фудбалска федерација (ФФФ) ги избра деветте градови кои ќе бидат домаќини на Европското фудбалско првенство во 2016 година

Избрани се градовите Сен-Дени (Стад де Франс), Париз (Паркот на принцовите), Лил, Бордо, Ница, Лион, Марсеј, Ланс и Нанси, соопшти секретарот на ФФФ, Бернар Дезумие. Лион успеа да се избори да биде домаќин на Еврото 2016 иако до последен момент не беше извесно дали ќе се гради новиот стадион со 60. 000 места. Покрај Лион, со нови стадиони за ЕВРО-то 2016 ќе се стекнат уште и Бордо и Ница, додека тој во Лил веќе е е во изградба. Не е изненадување што на листата на стадионите се најдоа двата најголеми француски стадион Стад де Франс во Сен Дени и Велодром во Марсеј. Нанси успеа да се избори за место во силна конк*ренција со Тулуз и Сен Етјен.