Српскиот тенисер по втор пат во својата кариера го освои Мастерсот во Индијан Велс реванширајќи му се на Рафаел Надал за поразот во финалето од 2007 година со триумф од 4-6, 6-3, 6-2 во сетови.

Фантастичната серија резултати на Новак Ѓоковиќ во 2011. година продолжи и на силниот Мастерс во Индијан Велс. Третиот тенисер на светот на патот до својата нова титула оваа сезона зад себе ги остави првите двајца тенисери на АТП листата и стигна до скор од 20 победи без пораз оваа година.

Покрај Дејвис купот, кој го освои со Србија на почетокот на декември, Ѓоковиќ го освои Австралија Опен, како и турнирите во Дубаи и Индијан Велс и на спектакуларен начин се врати на второто место на АТП листата.

“Прво да му честитам на Рафа на одличниот турнир. Денеска загуби, ни мислам дека добро ја почна сезоната и му посакувам се најдобро. Секогаш е големо задоволство да се игра против тебе. Ти си голем шампион и за мене најголем тенисер на сите времиња“ - изјави Србинот по финалето.

Надал останува неприкосновен, но се поизвесно е дека неговото ривалство со Рожер Федерер полека ќе паѓа во сенка. Сега Ѓоковиќ би требал да биде неговиот најголем ривал.

Ова е и прва негива победа во кариерата над Шпанецот во едно финале. Сите досегашни пет директни борби за титулата до сега Надал ги имаше решено во своја корист.

За овој свој триумф Ѓоковиќ се закити и со парична награда од 611.000 долари.