Конечно, падна и Јунајтед

Вулверхемптон му го нанесе првиот пораз на лидерот сезонава, а Њукасл по негативата од 0:4 со Арсенал, дојде до бод

Лудото саботно попладне во Премиерлигата кулминираше со најголемото изненадување. Вулверхемптон го надигра и заслужено го совлада лидерот Манчестер Јунајтед, нанесувајќи му го првиот пораз сезонава. Иако, со голот на Нани поведоа уште во третата минута фудбалерите на Алекс Фергусон тотално потфрлија, а посебно тоа се однесува на прекините од кои ги примија двата гола. Олокоби израмни во 10 минута, а Кевин Дојл пет минути пред одморот ја донесе победата.

Фергусон проба со Сколс и со Хавиер Хернандез, но тоа не беше оној Јунајтед кој се враќаше во натпреварите и кој ги крадеше бодовите во судиските продолженија.

„Разочарани сме. Долго време не знаевме за пораз. Сепак, играчите треба да бидат горди на таа низа. Тие се многу незгодни при прекини и тоа се докажа денес“, беше краток Фергусон, кој на загревањето пред мечот остана без Рио Фердинанд кој се повреди, па во дефанзивниот ред мораше да игра Џони Еванс.

Вулверхемптон, пак, по победите над Ливерпул и над Челзи успеа да му го скине скалпот на уште еден гигант. На крајот тоа може ништо да не му значи, бидејќи и натаму се наоѓа на последното место на табелата.

Ако на хоризонтот не се појавеше Вулверхемптон тогаш овој текст сигурно ќе го почневме со Њукасл. „Црно-белите“ направија чудо. Губеа од Арсенал 0:4 за на крајот да извлечат бод (4:4)!

„Топчиите“ стартуваа фуриозно, а во 10. минута водеа со 3:0 (Волкот 40 секунда, Џуру и Ван Перси). Во 25 минута Ван Перси го постигна својот втор гол и сите мислеа дека Њукасл ќе брои до 10. Како ли само се излажаа.

Вториот дел почна со непотребната и испровоцирана реакција на Диаби, кој најпрвин го турна Бартон, а потоа и Кевин Нолана, за што од судијата Фил Дауд доби директен црвен. Враќањето на Њукасл почна во 68 минута кога сомнителниот пенал го реализираше Бартон. Само седум минути подоцна Бест намали на 2:4. Експлозијата од одушевување настана во 83 минута кога Росицки направи уште еден пенал, а Бартон втор пат беше стрелец за 3:4. Во 87. минута Тиоте со фантастичен волеј израмни на 4:4, а да погодеше Бартон за 5:4 ова ќе беше приказна над сите приказни. „Тешко е се' да се проголта, но времето ќе го направи своето, ќе го преболиме ова губење на два бода. Некои одлуки не ми се допаднаа. Диаби беше пренервозен, ама и Бартон требаше да биде исклучен за ист таков старт“, изјави Венгер.

Неговиот колега од спротивната страна Алан Пердју смета дека на психолошката состојба на неговиот тим влијаело и заминувањето на напаѓачот Енди Керол во Ливерпул: „Тоа им го кажав на полувремето. Ако се сожалувате в ред, беше ова тешка недела, пораз кај Фулам, губење на Керол. Но, ако излезете со тоа на терен ќе бидете посрамотени. И тоа ви се случи. Сепак, во вториот дел ја кренавме главата. Ова беше еден од најверојатните мечеви што сум ги доживеал во својот живот“, потенцира Пердју.

Резултати од 26.коло: Астон Вила - Фулам 2:2, Евертон - Блекпул 5:3, Манчестер Сити - ВБА 3:0, Њукасл - Арсенал 4:4, Тотенхем - Болтон 2:1, Виган - Блекбурн 4:3, Вулверхемптон - Манчестер Ј. 2:1. Табела: Манчестер Ј. 54 (-1), Арсенал 50 (-1), Манчестер Сити 49, Челзи 44 (-2), Тотенхем 44 (-1), Сандерленд 37...