Најубави хотели

Музика до даска....

Во хотелот "nhow" кој треба во ноември да биде отворен во Берлин, се е насочено кон музиката. Доколку гостинот посака гитара во собата, послугата со задоволство ќе му ја донесе, а исто така може да добие и појачало, микрофон и слушалки.

Хотелската бања е опремена со микрофон кој директно е поврзан со хотелското тонско студио, така секоја мелодија или стих ќе можат веднаш професионално да бидaт снимени. Па кога следниот пат Rihanna или Bono Vox ќе ги фати инспирација додека се тушираат не мораат да се трудат да ја запаметат мелодијата.

Директорот на хотелoт, Alexander Durr, објаснува дека се свесни оти не можат да ги наполнат сите 300 соби со пејачи, па затоа целната група им е поширока. "Нашиот иновативен концепт не е само маркетиншки атрактивен. Се наоѓаме во делот на Берлин кој е познат по развиената уметничка сцена, па одлично се вклопуваме во целината" - додава тој.

Хотелот се наоѓа помеѓу седиштето на Universal Music и телевизискиот музички канал MTV, како и во близина на бројни клубови и концертни сали во кои настапуваат многу познати музички ѕвезди.

За хотелот да изгледа атрактивно се погрижи архитектот Sergej Tchoban. Во различни делови од хотелот доминираат различни бои, па така розовата владее на исток, а сината на запад. Ентериерот е мешавина на стилови од 60-тите и од 70-тите, со што е вистински контраст на модерната надворешност.

Хотелот ќе има 4 ѕвездички, ноќевање во стандардни соби ќе изнесува 170 евра, а во апартмани 250 евра, па и повеќе.

Изградбата на хотелот чинеше 70 милиони евра.