ТВ Пинк влегува во Македонија

Пинк 15 стартува во петок

Српската медиумска продукција Пинк ја купи К-15 телевизија и од петок стартува со емитување своја програма и во Македонија. По преговорите со неколку телевизии во земјава тие одлучиле дека К-15 им е најрационално решение. Македонија е петта земја во регионот, во која најголемата балканска продукција отвора своја телевизија, кај нас под името Пинк 15. 
- Ќе бидеме македонска телевизија со програма на македонски јазик и со најдобрите проекти на Пинк продукција што се емитуваат во регионот, изјави сопстевникот на Пинк, Жељко Митровиќ, на вчерашната прес-конференција во Скопје.

За почеток, ќе се емитува комбинирана верзија со пренесување на главните шоуа на Пинк како Гранд, Сити, Фарма... Планот за понатаму е 60 проценти од програмата да биде произведена во Македонија. Митровиќ најави инвестиција од 5 до 8 милиони евра во првите 18 месеци. 
Основата и на Пинк 15 останува забавната програма, но ќе има и информативна и документарна програма. Во првата година не е предвидена спортска програма, иако Митровиќ не ја исклучи можноста да се откупат правата за англиската Премиер лига.

Засега не се открива изборот за главните функции во телевизијата, кои ќе бидат познати до петок. За останатите ангажимани ќе има јавни огласи, а целата екипа треба да биде комплетирана за околу 2 месеци.

Митровиќ вели дека се одлучил за К-15 телевизија поради пријателството со сопствениците и условите за купување. Тој призна дека преговорите со ТВ Алфа биле во завршна фаза, но не кажа зошто дилот пропаднал во последен момент.