Интер не успеа да ја повтори одличната игра од првиот дуел со Спарси, кои сосема заслужено славеа со 3:1. Лесни победи за Манчестер Јунајтед и Валенсија, за малку од готово-вересија за Бенфика на дуелот со Лион. Копенхаген извлече бод против Барселона.

Тотенхем ја доби својата одмазда за поразот во Милано во претходното коло, кога Интер славеше со 4:3 во средбата во која тие имаа предност и од 4:0. Момците на Хари Реднап со головите на Рафаел Ван Дер Варт, Питер Крауч и Роман Пављученко целосно го надиграа актуелниот европски шампион славејќи голема победа од 3:1.

Холанѓанецот Ван Дер Варт, чиј настап според најавите пред средбата беше во прашање, го отвори резултатот во Лондон во 18. минута. Потврда на подобрата игра на Спарси беше водството од 2:0 кое им го донесе Крауч во 61. минута по една одлична топка од Герет Бејл. Велшанецот ја имаше улогата на асистент и при третиот гол на домаќините кои во 89. минута ставија точка на средбата преку Пављученко.

Девет минути претходно Самјуел Ето само им даде надеж на фановите на Интер дека можат да стигнат до бод кога успеа да го совлада Карло Кудичини. Сепак, Тотенхем не дозволи такво нешто и со овие три бода се изедначи со “нероазурите“ на првото место во групата А.

Во втората средба од истата група Твенте направи изненадување со победата од 2:0 над Вердер сред Бремен. Холандскиот претставник поведе во 81. минута преку Чадли, пет минути по црвениот картон на капитенот на домаќините Торстен Фрингс. Овие три бода го однесоа Твенте над Вердер на табелата со само два бода заостаток зад лидерите Тотенхем и Интер на две кола до крајот на групната фаза.

Во групата Б имавме сличен финиш како оној од пред две недели на “Џузепе Меаца“ кога Тотенхем од 4:0 намали на 4:3. Во Лисабон, Бенфика имаше предност од 4:0 во дуелот со Лион пред Французите да го намалат поразот на минимална разлика. Кардец, Гарсија и на два пати Коентрао им донесоа убедливо водство на домаќините, додека Гуркуф, Гомис и Ловрен само го ублажија поразот.

Во Тел Авив, Хапоел и Шалке одиграа без голови па така по ова коло во групата Б Лион остана лидер со девет бодови, но му се приближија Шалке и Бенфика.

Манчестер Јунајтед, според очекувањата славеше во Бурса, која го оправдува статусот на тотален аутсајдер во Лигата на шампиони. Флечер, Обертан и Бебе му донеса комотна победа од 3:0 на Јунајтед за десет бодови и прво место. Втора со седум поени сега е Валенсија, која со идентични 3:0 на домашен терен ги совлада Ренџерс. Солдадо на два пати и еднаш Коста беа стрелци за Валенсија.

Во Копенхаген, домаќините успеаја да извлечат бод во дуелот со Барселона играјќи 1:1. На голот на Меси во 31. минута, веднаш одговори Клодемир само една минута подоцна. Барса останува прва во групата Д со само еден бод предност пред Копенхаген кој има седум бодови до сега и продолжува да биде најпријатното изненадување во најелитното европско клупско натпреварување.

Група А

Тотенхем - Интер 3:1
(Ван Дер Варт 18, Крауч 61, Пављученко 89 - Ето 80)

Вердер - Твенте 0:2
(Чадли 81, Јонг 84)

ТАБЕЛА: Интер 7, Тотенхем 7, Твенте 5, Вердер 2.

Група Б

Бенфика - Лион 4:3
(Кардец 20, Коентрао 32, 67 Гарсија 43 - Гуркуф 75, Гомис 85, Ловрен 90)

Хапоел - Шалке 0:0

ТАБЕЛА: Лион 9, Шалке 7, Бенфика 6, Хапоел 1.

Група Ц

Бурса - Манчестер Јунајтед 0:3
(Флечер 48, Обертан 73, Бебе 77)

Валенсија - Ренџерс 3:0
(Солдадо 33, 71, Коста 90)

ТАБЕЛА: Манчестер Јунајтед 10, Валенсија 7, Ренџерс 5, Бурса 0.

Група Д

Рубин - Панатинаикос 0:0

Копенхаген - Барселона 1:1
(Клодемир 32 - Меси 31)

ТАБЕЛА: Барселона 8, Копенхаген 7, Рубин 3, Панатинаикос 2.