Ферари“ против „ферари најбрзата лимузина насветот

На сопственикот на најбрзата лимузина на светот, „ферари“ долго речиси седум метри, што постигнува брзина од 270 километри на час, компанијата „Ферари“ му се заканува со тужба поради кршење на авторските права. Ден Коулеј има 14 дена да ги отстрани сите симболи на „Ферари“ од својата лимузина, а забрането му е за лимузината да говори како за модел на „Ферари“.Адвокатите на „Ферари“ тврдат дека, откако Коулеј го преполовил моделот „360 модена“ и го продолжил со речиси три метри долгиот, рачно изработен дел направен од јаглеродни влакна, тоа едноставно не е повеќе „ферари“.  Ден, пак, се брани дека ја контактирал управата на „Ферари“ пред да започне со промената вредна 200 илјади фунти и дека оттаму му кажале да прави што сака, бидејќи автомобилот е во негова сопственост. Иако лимузината со осум седишта малку изгуби од силата, бидејќи е потешка за 160 килограми од оригиналот, што тежи 1.390 кг, силниот 3,6 литарски мотор и натаму може да постигне брзина од нула до 100 километри за шест секунди. Максималната брзина што може да ја постигне изнесува 268 километри на час, што е за незначителни 28 километри помалку од брзината во оригиналната изведба.  Ден (36) има своја работилница во англискиот град Манчестер и ова не му е прва промена на автомобил од позната марка. Во негова сопственост се и најдолгиот „хамер“ во Европа, на осум тркала и издолжениот „ренџ ровер спорт“, „крајслер 300“ и други возила. Тој најавува дека не се откажува и дека ќе се бори против автомобилскиот џин на суд. Лимузината може да се изнајми за 700 фунти за час, а била потребна цела година да се преправи моделот. Оваа лимузина е внесена во Гинисовата книга на рекорди како најбрза лимузина на светот.