Вести

Без стадионот во Киев, Украина го губи ЕВРО 2012

Претседателот на УЕФА, Мишел Платини, вчера и се закани на Украина со одземање на Европското првенство во 2012 година ако изградбата на стадионот во Киев наскоро не се помрдне од "мртва" точка. На конференцијата за новинари, одржана во седиштето на Европската комисија во Брисел, Платини изрази загриженост во врска со напредокот на изградбата поради што најави дека до крајот на неделата ќе ја посети Украина. Од новоизбраниот претседател Виктор Јанукович ќе побара во рок од десет дена да добие гаранција дека стадионите ќе бидат изградени навреме.

"Ако стадионот во Киев, на кој треба да се игра финалето, не биде завршен, Украина нема да биде домаќин на ЕВРО 2012", категоричен беше Платини.

Украина треба да го организира Европското првенство заедно со Полска каде работата на четирите стадиони (Варшава, Познањ, Гдањск и Вроцлав) засега напредуваат според планот. Добра е ситуацијата и во украинските градови Доњецк и Харков, но во Лвов и Киев има опасен застој. Освен тоа, се појавија и шпекулации дека Германија е подготвена да влета место Украина, но Платини ги отфрла ваквите приказни.

"Засега немаме 'план Б'. Загрижен сум за состојбата во Украина, но не губам надеж", порача првиот човек на европскиот фудбал.

Инаку, интересно е тоа што ваквите закани од Платини доаѓаат само две недели откако тој самиот изјави дека е презадоволен од подготовките за ЕВРО 2012 и дека нема никакви проблеми при изградбата на стадионите. Нејасно е како за толку кратко време Французинот се премисли иако и претходно многупати ја опомена Украина за застој во изградбата.

Со тешко срце го одбив Јувентус!

Селекторот на фудбалската репрезентација на Ирска, Џовани Трапатони синоќа изјави дека во февруари имал разговори со челниците на Јувентус и ја отфрлил нивната идеја по трет пат да седне на клупата на овој тим. Искусниот 71-годишен тренер истакна дека управата на "Старата дама" посакувала да го ангажира на местото на Чиро Ферара, меѓутоа тој одлучил да не ја прифати понудата и решил целосно да се посвети на ирската репрезентација.

"Со тешко срце го одбив Јувентус и останав да работам во Ирска. Едноставно немам сили да водам репрезентација и клуб во исто време, а освен тоа не сакав да испаднам нефер кон челниците на Ирскиот фудбалски сојуз кои ми даваат целосна поддршка во работата.", изјави Трапатони.

Италијанскиот стратег во периодот од 1976 до 1986 година со Јувентус освои шест титули во првенството но и Купот на европските шампиони. Неговиот втор "мандат", на почетокот на деведесеттите не беше толку успешен.

Бензема во Милан, Пато во Реал?

Според пишувањата на шпанскиот дневник "Спорт" во следниот преоден рок би можело да дојде до размена на двата големи гиганти на светскиот фудбал Милан и Реал Мадрид. Во прашање е размена помеѓу играчот на Милан Алесандре Пато(20) и играчот на Реал Карим Бензема(22). Пред трансферот во Реал Мадрид минатото лето Карим Бензема беше во одлична форма во дресот на Лион каде постигна 44 гола во две сезони, што го натера "Кралскиот клуб" да ги побара неговите услуги. Меѓутоа Бензема од 24 меча одиграни во дресот на Реал Мадрид има постигнато само 8 погодоци и така падна во сенка на Аргентинецот Гонзало Игуаин поради кој не успева да се избори за стартно место во тимот. Шпанските медиуми прогнозираат дека Реал е спремен да го продаде Бензема уште ова лето, а двата клуба кој се заинтересирани за неговите услуги се Манчестер Јунајтед и Милан. Цената која Реал ја постави за Бензема од 30 милиони евра е превисока за Милан, но "Спорт" пренесуваа дека управата на "Росонерите" во трансферот може да го вклучи и Бразилецот Алесандре Пато, кој неодамна за свој агент го ангажираше Мина Риола, посредникот помеѓу Барселона и Интер кој минатото лето ги заменија Златан Ибрахимовиќ и Самуел Ето. "Спорт" исто така истакнува дека Милан и Реал имаат одлични меѓусебни односи и доколку дојде до овој евентуален трансфер Милан би имал предност во однос на Манчестер Јунајтед.

МАКЕДОНЕЦОТ ОД ХЕРЕНВЕН СЕ ПОДГОТВУВА ЗА ЛЕТНА ТРАНСФЕР БОМБА
Њукасл е првиот пик за Горан Попов

Во листата на клубови со кои менаџерите на фудбалерот се во преговори се и екипите на Фулам, Волфсбург и Борусија Дортмунд

Во текот на минатата недела менаџерот на Горан Попов беше во Херенвен каде со управата на овој клуб стартува со преговорите околу продажбата на левиот бек во летниот преоден рок. Се подготвува трансфер "бомба" за нашиот репрезентативец кој се очекува да замине во голем клуб и во посилен шампионат. Од она што го дознавме барем засега пик број еден на фудбалерот и неговите менаџери е дресот на англискиот тим Њукасл. Заминувањето на Попов на "Сент Џејмс парк" во северот на Англија би бил одличен трансфер со оглед на тоа дека станува збор за голем клуб кој експресно се враќа во елитата на оваа земја. Популарните "страчки" веќе се во контакт со луѓето на македонскиот репрезентативец кој со своите игри во дресот на Херенвен докажа дека има квалитети и потенцијал за поголеми дострели. Попов е во рацете на познатиот менаџер Ален Аугустинчиќ, кој на својата листа на фудбалери го застапува и Един Џеко од Волфсбург. Тоа значи дека постојат огромни шанси Попов летово за замине во добра средина иако договор со Херенвен има на уште две години.

Покрај Њукасл на листата на клубови со кои се контактира се наоѓаат уште два тима од Англија и тоа Фулам и Бирмингем, но во опција е и заминување на Попов во Бундес-лигата. Доколку Попов оди во Германија тој е најблиску до дресот на Волфсбург иако во комбинација е и екипата на Борусија Дортмунд каде тренер е Јирген Клоп, човекот кој има одлично искусто со Аугустинчиќ по соработката со Новески од времето кога тренерот беше на клупата на Мајнц.

Левиот бек летово ќе инсистира да си замине од Херенвен затоа што клубот цела сезона беше во криза и се бореше за опстанок во лигата и покрај тоа што лани популарните "срциња" со Попов стигнаа до пехарот од Купот на Холандија и настапуваа во групите од Лигата на Европа. Секој преоден рок Херенвен ги продава своите најдобри фудбалери па така сега дојде и редот на Попов. Од балканците лани оваа екипа го продаде Даниел Прањиќ во Баерн Минхен, а пред тоа Миралем Сулејмани замина во Ајакс.

Фудбалски „местења“ на Балканот

	Игра ли и криминалот на теренот?

Недостигаат пари, а инфраструктурата се урива. Стадионите се речиси празни, освен за големите дерби натпревари. Кон ситуацијата не помагаат ниту раширените гласини за местење на натпреварите и поврзаност со организираниот криминал.

На натпреварот меѓу загребски Динамо и Локомотива, го сретнавме хрватскиот спортскиот новинар Алан Новицки:

- За секој натпревар има гласини дека е наместен. Но како тоа го прават навистина е зачудувачки. Или можеби се премногу моќни за владата.

БиБиСи: Дали во фудбалот има вмешаност на организираниот криминал?

„Не знам, верувам дека има нешто, но нема доказ за тоа. Малку е и опасно да се зборува за тоа, ако ме разбирате“.

Горчливо искуство

Човекот кој точно знае колку е опасно ако се поставуваат премногу прашања е Душан Миљеш. Тој 25 години истражува организираниот криминал во Хрватска. Има добиено и меѓународна награда за храброст во новинарството.

Вели дека изминатите две години живее под полициска заштита:

„Има многу сериозни показатели дека организираниот криминал е вмешан во спортот, особено во фудбалот. Еден познат фудбалски менаџер, Дино Покровац, беше убиен пред неговиот стан во јуни 2008, во очигледно убиство од организирана банда.“

БиБиСи: И вие бевте нападнат пред вашиот стан. Каква порака требаше да биде испратена со тоа?

" Тоа се случи на 2 јуни 2008. Бев претепан од две маскирани лица. Ми ја скршија левата рака и имав сериозно повреди на главата. Тоа беше типичен начин на испраќање порака од група на ораганизизраниот криминал".

Затоа новинарите се колебливи да истражуваат. Но што е со властите?

Се смета дека 14 напревари во Хрватска се меѓу 200 меча кои се под сомневање во огромниот скандал за местење на натпревари, обелоденет од германската полиција минатата година.

Претставници од светскиот фудбал сакаа да разговараат со Министерството за внатрешни работи, но тие одбија да коментираат.

Така постапи и Канцеларијата против организиран криминал, иако од таму потврдија дека се води истрага.

	Колку од натпреварите биле однапред договорени?

Меѓународна болка

Но неодамна избраниот претстедател на Хрватска, Иво Јосиповиќ, се согласи да го објасни огромниот предизвик со кој се соочуваат оние кои сакаат да и застанат на пат на корупцијата.

„Има многу гласини дека многу од натпреварите биле претходно договорени. Но не сме и мале некоја сериозна истрага, ниту пресуди. Сега слушаме и читаме за корупција во фудбалот во цела Европа. Така што тоа е меѓународен проблем. Оваа болест треба да ја лечиме во секоја земја, вклучувајќи ја и Хрватска. Но во споредба со другите области од нашиот социјален живот, би рекол дека ова не е наш примарен интерес. Затоа што имаме многу посериозни случаи на корупција и организиран криминал во нашата економија. Се бириме против корупцијата, но очигледно не можеме да сториме се во исто време. Важно е во борбата да се вклучат и познатите лица, посебно од фудбалот, да застанат на фронталната линија и да им покажат на младите дека тоа не е добро однесување...Нулта толеранција.“

За време на престојот на екипата на БиБиСи во Хрватска постојано се спомнуваше едно име. Го спомнуваа новинарите, навивачите па дури и од такси возачите и вработените во хотелот. „Ако сакате да дознаете за местењето на натпревари на Балканот, мора да го прашате Џаро"- велеа тие.

Сите го знаат Џаро

Така допатуваме до Македонија, за да го сренеме Велибор Џаровски, човек кој поминал затворска казна во поранешна Југославија за местење на натпревар. Сега ужива нешто како статус на славно лице. И тврди дека и сега е прилично вовлечен во бизнисот:

-„Таму каде што има играчи во Европа од бивша Југославија таму се првенствата се највалкани. Еве видете, сега во Хрватска се блокирани обложувањата..."

Џаро покажува список од натпреварите од претходниот ден и додава дека за некој од нив престанале да примаат обложувања.

БиБиСи: Дали затоа што мечот бил наместен?

„Види не може се да се држи во тајност 100 посто. Веројато откриле дека на овој меч нешто се случува, па го блокирале."

БиБиСи: Утврдени се докази за местење на скоро 200 натпревари. Дали мислите дека ќе одат и подлабоко, да откријат уште?

„Од тие 200, само за десет отсто има докази..."

Додека разговаравме со Џаро пред една кладилница во Скопје, му приоѓаа луѓе со ливчиња за обложување и со прашања за совет. Тој постојано одговараше и на телефон, во Хрватска, Србија...насекаде. Тој е како еден вид гуру за обложување, со екстра знаење.

Претстедателот на УЕФА, Мишел Платини, зборуваше за неговата решеност да ја искорени корупцијата.

Но ако му се верува на Џаро, и доколку е вистина она што го слушнавме во Хрватска, тогаш пред него е многу висока планина за качување.

Решение против „Победа“

Портпаролот на УЕФА Роберт Фокнер вели дека источна Европа е се' повеќе фокус на борбата:

-„Постои чувство дека многу нешта се поврзани, не се знае дали со истата група што оперираше во Германија и пошироко. Еве, пред некој ден Арбитражната комисија во Лозана го поддржа решението против македонска „Победа" и доживотната забрана за претседателот и играч на клубот. Ние им даваме на државните фудбалски здруженија податоци за активности кои ги сметаме за незаконски, им помагаме, но не е лесно.“

БиБиСи: Дали борбата воопшто може да се добие?

-„Мислам дека неколку години, можеби целото интернет-обложување беше потценето иако се вртеа огромни пари. Сега успеваме со одреден надзор да сфатиме што се случува, соработувајќи со обложувалниците. Но тешкотијата е да се најде доказ и да се преземе нешто.“

strasno nesto ako e vistina

Леонардо си заминува, Милан бара нов тренер

Претседателот на Милан, Силвио Берлускони, вчера призна дека актуелниот тренер Леонардо на крајот од сезоната ќе ја напушти својата позиција и на негово место ќе биде ангажиран друг стручњак. Судбината на Бразилецот извесно време беше тема број еден во италијанските медиуми и многумина шпекулираа дека по само една сезона ќе дојде до разделба меѓу Милан и Леонардо. Причина за тоа беа лошите резултати во првенството, раната елиминација во Лигата на шампионите и фактот што Милан помина уште една сезона без трофеј.

"Да, Леонардо си заминува. Работиме на ангажирање на нов тренер. Кој ќе биде тоа? Разговараме со неколку луѓе. Леонардо беше многу тврдоглав, а екипата играше мошне лошо оваа сезона", додаде првиот човек на Милан и актуелен италијански премиер.

Кориере дело спорт тврди дека главни кандидати за наследник на Леонардо се некогашните фудбалер на Милан, а сега функционери во клубот Мауро Тасоти и Филипо Гали. Тасоти во моментов му е прв помошник на Леонардо, а Гали е дел од стручниот штаб. Леонардо, пак, подолго време се спомнува како нов селектор на Бразил на местото на Дунга кој најави оставка по Светското првенство во Јужна Африка.