Зимски Олимписки Игри - ЗОИ Ванкувер 2010

Од утре до 28 февруари во Ванкувер ќе се одржуваат 21-те Зимски олимписки игри на кои ќе учествуваат над 5.500 натпреварувачи од околу 80 земји во 15 спортови.

По Монтреал 1976 година (ЛОИ) и Калгари 1988 година (ЗОИ) ова е трета Олимпијада на која домаќин е Канада.

Најголеми фаворити за освојување на медали се натпреварувачите од Германија, САД и Австрија.

Македонија во Ванкувер ќе ја претставуваат тројца натпреварувачи. Алпинецот Антонио Ристевски и нордијците Дарко Дамјановски и Росана Кироска се македонските учесници на 21-то издание на зимските олимпијади. Норма во Биатлон имаше исполнето и Ѓорѓи Ицовски, но тој отпадна, бидејќи според критериумите на меѓународната Биатлонска унија олимписките визи се делат врз основа на националното рангирање, а не индивидуално.

Свеченото отворање на ЗОИ ќе биде во 18 часот по локално време, односно во 13 часот по македонско време. Според средствата одвоени за програмата на отворањето се очекува спектакл. Околу 40 милиони долари се потрошени за организирање на утрешната церемонија, што значи второ најскапо свечено отворање после ЛОИ во Пекинг 2008 година.

официјален сајт: http://www.vancouver2010.com/

 

Нека победат најдобрите и многу среќа за нашите учесници!

Дарко Дамјановски е најискусниот во составот, но и спортист кој успеа да обезбеди "А" норма. Со тоа стана првиот македонски натпреварувач на зимските игри кој успеал да се избори за норма и место на игрите без валјд-карта. Сепак, во неговата дисциплина конк*ренцијата е максимално голема, па секое место во првата половина од вкупниот број учесници ќе биде максимално добар резултат.

Росана Кироска е најмладата во македонскиот тим и на нејзиното деби на Олимписките игри не може да се очекуваат спектакуларни резултати. Ако успее да истрча добро и да го потврди потенцијалот секако дека ќе треба сите да бидат задоволни. Таа ќе биде првата која ќе излезе на старт од македонските репрезентативци на игрите, па ќе има за задача да го "скрши мразот".

Знаменосецот на Македонија, Антонио Ристевски ќе чека за своите настапи, па ќе има време добро да се запознае со условите. И тој влегува во трка со многу поискусни скијачи од него. Нема притисок и за него за спектакуларен резултат, но може да се очекува да отскија добро. Влез меѓу најдобрите 30 по првата трка и во слалом и во велеслалом би било рамно на подвиг или на место на пиедесталот. Сепак, за сето ова многу повеќе ќе се размислува кога ќе дојде времето.

Најважно од сe во моментов е дека Македонија по четвртипат има свои претставници под сопствено знаме. Првпат настапи Весна Дунимаглоска во 1992 година, но тогаш под друго знаме, а откако во 1994 година ги пропуштивме Игрите во Лилехамер секогаш имаме свои претставници. Честа овој пат им припадна на Кироска, Дамјановски и Ристевски. Сите погледи во следните две недели ќе бидат насочени кон нив.

***

Првпат со "А" норма

На овие игри Македонија првпат има свој натпреварувач кој има обезбедено "А" олимписка норма. Се работи за Дарко Дамјановски, кој во понеделник ќе настапи на патеката од 15 километри трчајќи во слободен стил.

Нордијците први на терен

Претставниците на Македонија во нордиските дисциплини, Росана Кироска и Дарко Дамјановски први ќе излезат на терен. Росана ќе настапи во понеделник, од 19 часот по македонско време (10 по локално). Дајмановски настапува два и пол часа подоцна.

Ристевски дури на 21 февруари

За разлика од Кироска и Дамјановски, Антонио Ристевски има повеќе време за аклиматизација. Тој ќе настапи дури на 21 февруари, кога на програмата е трката во велеслалом. Шест дена подоцна ќе биде дел и од трката во слалом.

Скијачите првпат со еден претставник

Во составот на Македонија првпат на една Олимпијада имаме повеќе натпреварувачи во нордиско скијање отколку што имаме скијачи. Досега вообичаено имавме повеќе претставници во алпско скијање. Сега има само еден скијач, но затоа ќе имаме и двајца олимпијци на патеките во нордиско скијање кои ги предводи поранешниот нордиец и македонски олимпиец Ѓоко Диневски.

Дамјановски трет со втора Олимпијада

Нордиецот Дарко Дамјановски ќе биде третиот олимпиец од Македонија кој по вторпат ќе учествува на Зимските олимписки игри. Тој беше дел од македонската експедиција и на Игрите во Торино.

Претходно двапати на ЗОИ учествуваа и Ѓоко Диневски и Јана Николовска.

Делегација од десетмина

Покрај тројцата натпреварувачи во македонската делегација има уште седум официјални лица. Тука се тренерите Иван Лесевски, Владимир Пановски и Ѓоко Диневски. Претседателот на МОК, Васил Тупурковски пристига во понеделник. Секретарот Сашо Поповски дојде неколку дена по олимпијците, додека директорот Владимир Богоевски е заедно со другите уште од првиот ден во Ванкувер.