Иринеј бара „жртви и страдања“за одбрана на Косовo

   Иринеј бара „жртви и страдања“ за одбрана на Косово

Косово е нашата света земја и мора да бидеме спремни на секоја жртва за да го зачуваме, макар и да се потребни страдања, изјави Иринеј по устоличувањето во Белград

Жртви, па и страдања за одбрана на Косово од сите што сакаат да го грабнат, побара Иринеј, новиот патријарх на Српската православна црква.

По устоличувањето во саботата, тој изјави дека е свесен за одговорноста и се надева дека заедно со народот ќе успее да „го издржи бремето на крстот што го носи“.

- Најважна задача на нашата црква и на нашиот народ е да и' помогне на државата да го зачува своето свето маченичко Косово од сите што сакаат да го приграбат. Косово е нашата света земја и мора да бидеме спремни на секоја жртва за да го зачуваме, макар и да се потребни страдања. Ако ние го заборавиме Косово, и тоа ќе не заборави нас - изјави Иринеј по церемонијата на устоличување во Соборната црква во Белград.

Тој додаде дека „со стегната душа и со радост“ го очекува патот во Пеќската патријаршија, каде што треба свечено да се одржи светиот чин на устоличување.

- Не знаеме дали ќе стасаме секаде каде што сме наумиле, но не' исполнува радост зашто ќе ги видиме нашите светињи, манастирите „Дечани“, „Богородица Љевишка“, „Грачаница“ - изјави патријархот. Тој повика на единство на српската црква и истакна дека нејзина задача е „да го соедини и зачува српскиот народ“.

Обраќајќи им се на епископите, патријархот Иринеј изјави дека пред СПЦ има низа задачи, за кои ќе се договорат на црковните сабори.

Панагијата на српските патријарси и патријаршискиот жезол Иринеј ги прими од митрополитот Амфилохие, кој беше чувар на тронот по смртта на патријархот Павле. Освен црковните достоинственици, на свеченоста присуствуваа и премиерот Мирко Цветковиќ, вицепремиерот Ивица Дачиќ, градоначалникот на Белград, Драган Ѓилас, премиерот на Република Српска, Милорад Додик, како и српскиот принц Александар Караѓорѓевиќ.

Честитка на новиот српски патријарх му упати и папата Бенедикт Шеснаесетти, изразувајќи надеж дека двете цркви ќе ја продлабочат соработката. Непосредно пред изборот на нов патријарх на СПЦ, Иринеј изрази надеж дека поглаварот на Римокатоличката црква би можел да го посети Ниш во 2013 година, да учествува на собирот по повод 1.700-годишнината од Миланскиот едикт.

Меѓу низата честитки од странство, весникот „Блиц“ ја истакнува таа од Кремљ, во која рускиот претседател Дмитриј Медведев изразува надеж дека Иринеј ќе придонесе за зацврстување на братските врски меѓу двата народа.

http://www.dnevnik.com.mk/?ItemID=5B4FC71FC4DEEC4696F498E713BCA07D