Македонската репрезентација

 Фудбалската репрезентација на Македонија ќе се стреми да се пласира на едно од првите две места во квалификациите за Европското првенство во Полска и Украина 2012 година. Оваа генерација на репрезентативци има игра и квалитет да се спротивстави на која било друга селекција и треба со сите сили да се впуштиме во борба за одење на ЕП, истакна селекторот на македонската фудбалска репрезентација, Мирсад Јонуз, на денешната прес конференција во ФФМ.

- На сите досегашни квалификации сме завршувале како четврти и доколку се случи тоа и овојпат, јас ќе бидам ист како и моите претходници, значи неуспешен. Го прифаќам предизвикот и доколку не успееме ќе ја превземам одговорноста на себе, рече Јонуз.

Тој даде свое видување за групата во која ќе игра Македонија во следните квалификации. Според него, противниците се тешки, но не и непобедливи. Игрите на пријателските натпревари и постигнатите резултати во изминатите шест месеци со право даваат надеж, како што рече селекторот, да се почнат квалификациите со позитивен резултат кој ќе не одведе до крајната цел. Русија е прв фаворит, со Ерменија и Андора мора да се освојат 12 бода, а во директните дуели со Република Ирска и Словачка да се бара патот до успехот, смета македонскиот селектор.

Првично е договорено календарот за одигрување на натпреварите во групата Б да се направи на 18 овој месец во Москва.

- Одиме во Русија со наш план кој секако не мора да се прифати во целост бидејќи секоја репрезентација ќе има свои желби. Доколку не добиеме гаранција од Владата дека до септември комплетно ќе биде завршена Јужната трибина на стадионот „Филип Втори“, тогаш ќе инсистирам двата натпревара во септември да ги одиграме на гости, а потоа да бидеме двапати домаќини во октомври. Желбата на повеќето репрезентативци е на првиот дуел да гостуваме во Русија, изјави Јонуз.

До септември за кога е закажан почетокот на квалификацискиот циклус во план е Македонија да одигра неколку пријателски натпревари. На 3 март во Скопје доаѓа Црна Гора. При крајот на мај ќе се игра со Босна и Херцеговина, Јужна Кореја или Луксембург. На 11 август е закажана средба со Малта во Ла Валета.

Како и во изминатиот период така и во следниве пријателски натпревари Мирсад Јонуз ќе вклучи неколку нови имиња во репрезентацијата, а ќе им се даде уште една шанса за враќање во националниот тим и на неколку повремени репрезентативци. Тука пред се се мисли на Славчо Георгиевски и Стевица Ристиќ.

Селекторот на македонската фудбалска репрезентација, Мирсад Јонуз денеска го соопшти списокот на играчи за претстојниот пријателски натпревар со селекцијата на Црна Гора што ќе се одигра на 3 март во Скопје со почеток 14 часот и 30 минути.

- Добра прилика за нашата репрезентација пред македонската публиката да одигра еден добар контролен натпревар со квалитетен противник. За нас овој натпревар значи нов предизвик и инспирација, но и шанса тимот уште подобро да се воигра, а и да се реваншираме за поразот во Подгорица. На списокот се играчи кои во изминатиов период добиле шанса и заслужуваат да бидат повикани, а единствено ново име е играчот на Рад од Белград, 25-годишниот Александар Тодоровски којшто игра на десна странична позиција, изјави Јонуз за веб сајтот на ФФМ.

Тој додаде дека натпреварот ќе биде прилика да види во каква форма се фудбалерите, бидејќи повеќето од нив се на одмор и чекаат да почне вториот дел на првенството.

За противникот македонскиот селектор има многу пофални зборови.

- Секогаш е предизвик да се игра против репрезентација која доаѓа од бившите ју-простори, а посебно кога во своите редови имаат играчи како Вучиниќ, Вукчевиќ, Бошковиќ. Тоа ќе биде дополнителен мотив да прикажеме убава игра и да оствариме нова победа, истакна Јонуз.

Список на фудбалери за пријателскиот натпревар со Црна Гора:

Голмани: Томе Пачовски и Един Нурединовски.

Одбрана: Гоце Седлоски, Игор Митрески, Владе Лазаревски, Николче Новески, Бобан Грнчаров.

Среден ред: Арменд Алими, Величе Шумуликоски, Филип Деспотовски, Горан Попов, Александар Тодоров, Славчо Георгиевски.

Напад: Горан Пандев, Илчо Наумоски, Ацо Стојков, Бесарт Ибраими и Душан Савиќ.