Свински грип

Јованка Костовска

49-годишна жена синоќа била донесена во Ургентниот центар откако еден час по примање на вакцината добила силни главоболки и трнење на рацете и нозете.

Лекарски извори за А1 велат дека во моментот кога била донесена веќе и била одземена едната страна од телото по што била хоспитализирана на Клиниката за неврологија, но и дека симптомите наликуваат на парализа или Жилине баре синдромот, поради кој во Канада беше повлечена цела серија вакцини.

Надлежните од министерството се интересирале за случајот, но не ја соопштија информацијата на новинарите. Реагираа доцна вечерва откако А1 ја објави веста.

„Бидејќи имавме сознание дека пациентка се пожалила на саат-два после вакцинација на главоболки, трнење по мускулите, бидејќи сакаме сите пациенти да ги следиме и најмал проблем ако се јави после вакцинација да го испитаме, превентивно испратена е пациентката на Клиника за нервни болести, хоспитализирана е, чисто за да се провери да не се пропушти нешто“ рече Јованка Костовска, комисија за пандемски грип.

На Клиниката за неврологија тврдат дека пациентката е во стабилна состојба, но не станувало збор за парализа туку за трнење на нозете. Таа и претходно имала проблеми со рбетниот столб.

Несаканите реакции од оваа вакцина се исти како од сезонскиот грип

Од Министерството за здравство велат дека нема место за паника, тие и понатаму внимателно ќе ја следат секоја несакана реакција. Доколку има отстапки поголеми од предвидените ќе реагираат благовремено.

„Продолжуваме да ги следиме сите и апелирам до луѓето коишто ќе се вакцинираат, ако добијат некој симптом којшто им е поневообичаен, ако е обична главоболка, мала температура, болка, црвенило на раката - тоа е очекувана реакција и не е ништо страшно. Ако им е нешто сомнително да се јават, ќе ги проследиме, ќе испитаме, да не се плашат, нема место за паника. Несаканите реакции од оваа вакцина се исти како од сезонскиот грип“, вели Костовска.

Пред неколку дена Инфективната клиника ја напушти и лекарка од Прилеп која имала конвулзии по примање на вакцината. Надлежните не ги поврзуваат овие реакции со вакцината.