Русија предлага евроатлантски пакт за мир

Новата безбедносна рамка на Медведев и на Путин треба да обезбеди мир од Ванкувер до Владивосток и практично го релативизира постоењето на НАТО

Сите безбедносни прашања да се решаваат заеднички и да се дејствува заеднички, никој да не формира воени сојузи и да се има максимална контрола врз вооружувањето. Ова е суштината на руската безбедносна рамка, која треба да го редефинира 21 век „од Ванкувер до Владивосток“, како што стои во документот, кој ексклузивно го добивме од рускиот амбасадор Владимир Солоцински. 

За предлогот на Русија нејзиниот претседател Димитри Медведев зборуваше уште на Конференцијата за светска политика во Евијан во октомври 2008 година, потоа на самитот Русија–ЕУ во Ница во ноември 2008 година, и на истапувањето во Хелсинки во април годинава. Предлогот е конкретизиран на 27 јули годинава, и според руската замисла, би требало да се разгледува на Паневропски самит, специјално организиран за тоа, каде што покрај европските земји, учество ќе земат и САД и Канада. 

Иако амбасадорот децидно тврди дека рускиот предлог не значи барање да се укине НАТО, во предлогот може да се насети постепеното одумирање на северноатлантската алијанса. 

Документот се состои од шест точки. Првата наведува дека „треба да се содржат јасно потврдените базични принципи на безбедност и меѓудржавни односи на евроатлантскиот простор. Тоа е приврзаност за совесно исполнување на меѓународните обврски, уважување на суверенитетот, територијалната целосност и политичка независност на државата“. 

Во втората точка се предлага јасно да се потврди дека не е прифатлива примена на сили во меѓународните односи. Договорот треба да е должен да даде гаранција за еднообразно толкување и придржување на тие принципи. 

Понатаму во третата точка, која е посебно интересна бидејќи го релативизира НАТО, се предлага да се гарантира еднаква безбедност. 

„Тука е неопходно е да се направи трето „не“. Имено – да не се обезбедува својата безбедност за сметка на безбедноста на другите. Да не се допушта (во рамките на саканите воени сојузи и коалиции) дејства со кои се ослабнува безбедноста на општото пространство. Да не се дозволува создавање воени сојузи што со своето постоење би и нанеле штета на безбедноста на другите учесници во Договорот“, пишува во документот. 

Четвртата точка на некој начин го укинува американското однесување на „светски полицаец“, па вели: 

„Во Договорот е важно да се потврди дека ниту една држава и ниту една меѓународна организација не можат да имаат ексклузивни права на одржувањето на мирот и стабилноста во Европа. Во полна мера ова се однесува и на Русија“. 

Со петтата точка се предлага контрола на вооружувањата, а со шестата, зајакнување на меѓународната соработка во борбата против трговијата со дрога, тероризмот и другите форми на криминал. 

На крајот, во документот се наведува дека веќе има позитивни сигнали за прифаќање на руската иницијатива. 

„На самитот Русија - ЕУ во Хабаровск на 22 мај оваа година, генералниот секретар на Советот на ЕУ и висок претставник на ЕУ за општа надворешна политика и политика на безбедноста Хавиер Солана, официјално ја објави спремноста на ЕУ да се вклучи во дијалог за евробезбедноста, во согласност со иницијативата на Русија“. 

Автор: А.Б. 
Shto mislite vie za ovoj niven predlog? 