Бошковски ослободен, Тарчуловски виновен!

Хашки подметнувања

Што народ сме! Народ кој знае арно да каже само за покојници, а за живите се' најлошо! Кој знае да пофали дури кога некој ќе постигне успех во странство, а додека е дома го оспорува! Кој умее некого да го издигне до небеса, а веќе утре со сета силина да го тресне од бетон! Кому омилена поговорка му е - да му умре козата на комшијата!

Ги гледам извештаите од јавната седница во Хаг и не можам да се изначудам. Излезе дека поважно од тоа каква одбрана ќе се даде во жалбената постапка, било што си рекле Јохан и Љубе во судницата. Дали навистина Тарчуловски го турнал од себе Бошкоски, кога овој наводно се обидел да го гушне и му рекол „марш предавнику“. Демек едниот бил херој, а другиот предавник.

Многу срамно, дегутантно и сосема без врска. Кому сето тоа му користи и кој има полза од ширење на вакви гадости. Тарчуловски најмалку. Зарем на денот кога сите со внимание следеа што се случува во хашката судница и дали ќе се даде доволно добра аргументација околу легитимноста на акцијата во Љуботен, имаше потреба од вакви подметнувања. Да се прави непотребен циркус и целосно да се измести фокусот од судското рочиште. А, сите добро знаат дека од исходот на судскиот процес, кој е во жалбена постапка, зависи дали Тарчуловски ќе успее да се одбрани од обвинувањата на Хашкото обвинителство и конечно ќе излезе на слобода.

Како Љубе да е виновен што Трибуналот го ослободил, а на Јохан му досудил затворска казна во траење од 12 години. Наместо целата енергија на државата, а особено на владејачката партија ВМРО-ДПМНЕ да се насочи на тоа како да им се помогне на адвокатите на Тарчуловски да се докаже вистината за вистинскиот карактер на конфликтот од 2001 година, се прават недоветни брифинзи во политички цели.