Каде македонски бугарчиња?

Македонците се помалку земаат бугарски пасош, по најавите дека до крајот на годинава без визи ќе патуваат во земјите од Европската унија, тврдат сопствениците на агенциите за посредување. Трендот на вадење бугарски пасош, кој со години имаше нагорна линија, беше единствен начин граѓаните да ги одбегнат турканиците пред амбасадите и без виза да патуваат низ Европа. Од агенциите за посредување тврдат дека последниве неколку месеци само дваесетина граѓани се заинтересирале да почнат процедура за издавање бугарски пасоши. - Граѓаните што доаѓаат кај нас објаснуваат дека секојдневно слушаат како за Македонија ќе важи безвизниот режими и повеќе не им се исплати да вадат бугарски пасош. Процедурата трае повеќе од една година, а и тие граѓани што веќе ги поднеле документите, бараат постапката да се запре и да им ги вратиме парите. Секојдневно се убедуваме дека не можат да ги добијат парите - вели сопственик на фирма за посредување за бугарски пасоши од Струмица. Исто така, во весниците се помалку можат да се најдат огласи за луѓе што посредуваат за вадење бугарски пасоши иако изминативе години ги преплавуваа огласните страници. Европската унија досега неколкупати најави дека Македонија ги исполнува сите услови да се најде на белата шенген-листа и доколку претстојните избори поминат без инциденти, ќе нема никакви пречки до крајот на годинава да се укинат визите. Интересот за вадење бугарски пасоши трае веќе десетина години, а нагла побарувачка имаше во периодот кога Бугарија стана членка на Европската унија. Многубројните македонски државјани што работат во странство доколку поседуваат бугарски пасош без никакви проблеми можат да дојдат до вработување и до неопходната работна дозвола. Спротивно на тоа, доколку тоа го прават со македонски пасош, најпрвин се судираат со проблемите во амбасадите, каде што мора да покажат купишта документи со кои треба да го оправдаат престојот. Постапката за вадење бугарски пасош може да трае и неколку години. Кандидатите прво пополнуваат изјава дека се чувствуваат како Бугари или приложуваат документи со кои докажува дека имаат бугарски корени. Потоа се уплаќа од 300 до 500 евра и се чека на посредниците за да се подигне пасошот, државјанството и личната карта во некои од пограничните градови во Бугарија. Иако не постојат официјални податоци колку македонски граѓани досега зеле бугарски пасоши, неофицијално се говори за бројка од 20.000 „новопечени“ Бугари. Поголем дел од нив се од источниот дел на Македонија, од реонот на Струмица, Штип, Свети Николе, Македонска Каменица, каде што и не постои фамилија во која некој нема бугарски пасош. Неодамна и Бојко Борисов, лидер на опозицијата во Бугарија и најсериозен кандидат за нов бугарски премиер, изјави дека само со економски вложувања и издавање бугарски пасоши за македонските граѓани Македонците ќе можат да ја сфатат вистината за бугарските корени.