Преговори и за идентитетот?

Преговорите за името се максимално проширени и посредникот Метју Нимиц одамна е излезен од рамката за преговори. Тој тврди дека се преговара само за референца или име, а не за идентитет, што воопшто не е точно. Зошто тогаш Нимиц избегна да спомене македонски јазик и македонски идентитет? Грешка е што воопшто се влезе во преговори зашто државата има личен избор како ќе се нарекува. Мора да се стегне обрачот на преговорите и да се покаже конструктивен, но цврст став.

Јетон Шасивари, професор на Штуловиот универзитет
Апсурдно е да се преговара за националниот идентитет

Националниот идентитет е категорија за која не смее и за која е апсурдно да се преговара. Не постои таков случај во светот каде што се преговара за идентитетот. Затоа значајно е што Нимиц во Скопје демонстрира умерен оптимизам, што значи дека постои поместување напред. Важно е да се раздвои објектот на овој спор, да се преговара само за името на државата. Во преговорите се разговара само за правниот, а не и за националниот идентитет. Во ОН треба да стои правниот идентитет на државата.

Денко Малески, професор по меѓународна дипломатија
Целиот проблем излезе од мандатот

Овој проблем толку долго трае што веќе е променет и карактерот на дебатата. Имено, ако во почетокот дебатата беше како да се направи дистинкција меѓу Република Македонија и грчката провинција Македонија, денес суштината на спорот е како да се дефинира идентитетот на новата држава и нејзиниот народ и јазик. Од тука, дали посредникот Метју Нимиц излегува од мандатот е неважно бидејќи целиот проблем излезе од мандатот и сега е многу по сериозен. Сега се оди во пакет: дистинкцијата меѓу нашата држава и грчката провинција на меѓународен план, второ дистинкцијата на Македонците од оваа страна на границата со тие од онаа страна што себеси се сметаат за Македонци и конечно дистинкцијата на јазиците.

Во изјавата што Нимиц ја даде во земјава може да забележиме дека има мака да каже дека сепак се работи за идентитески спор во кој стои тешка задача, да се дефинира нашата нација.

Слободан Чашуле, поранешен министер за надворешни работи
Непристојноста на посредникот е двојна

Нимиц излезе на непристоен начин од својот мандат. Не само што тој излезе нудејќи решенија, што не е негова работа, бидејќи тој е посредник и прашањето треба да го решат Македонија и Грција, туку излезе и надвор од мандатот што го предвидуваат резолуцијата и привремената спогодба, нудејќи решенија за идентитетот, јазикот и културата, додавајќи им референци. Значи непристојноста на посредникот е двојна.

Јас само може да претпоставам, но факт е дека Македонија и Грција во овој момент немаат контрола врз процесот, кој сега е во функција на безбедносните интереси на Соединетите Американски Држави и Европската Унија.Тој притисок му дава право на посредникот да направи ваква ескапада и да се обиде да предизвика реакции. Тоа што Нимиц го нуди како тврдење дека Грците не го оспоруваат нашето постоење и јазик различен од нивниот не е ништо ново. Тоа го правеше и најголемиот крвник на Македонците, диктаторот Метаксас нарекувајќи нé славофони. Доколку се прифати овој предлог, дефинитивно ќе се реализира трајната грчка стратегија, на Балканот да нема народ што се вика македонски. И што е најстрашно им се дозволува на ова наше постоење, Грците да му дадат име. Мислам дека посредникот Нимиц всушност ги упропасти разговорите.