Претседателот Ѓорге Иванов

Иванов се уште без главните функционери

Единствената одлука што ја потпиша беше за отповикување на двајца амбасадори

Многу надлежности, малку одлуки. Претседателот Иванов и по три недели од преземањето на функцијата, се уште се нема решено да повлече позначаен потег.

Единствената одлука што ја потпиша беше за отповикување на двајца амбасадори - Кокароски од Полска и Тасковска од Холандија.

А што очекува јавноста, а особено Владата од новиот Претседател? За Груевски, според блиски соработници на двајцата државници, приоритетен е ставот за името.

За разлика од јавните, но често и заткулисни конфронтации со Црвенковски, сега Премиерот очекувал Македонија да зборува со еден глас. Иванов засега е на таа линија.

Изјавата дека двојната формула е минато, дадена во Брисел, аналитичарите ја протолкуваа како координирана промена на државниот став, со оглед дека Груевски беше на чело на таа делегација.

Началникот на ГШ Стојановски може во секое време да биде променет

Инаку, се уште нема ништо од иницијативата што Иванов предизборно ја најавуваше за средба со неговиот грчки колега Папуљас.

Нема ништо ново ниту на кадровски план - сите функционери во надлежност на Претседателот се уште се од времето на Црвенковски.

Најавите дека прв на тапет ќе биде Стојановски - не се остваруваат, па така началникот на ГШ и понатаму си го тера вториот тригодишен мандат кој му истекува во 2011-та. Но, тој нема законска заштита и може во секое време да биде променет.

Според извори блиски до Кабинетот, Иванов се уште се двоуми кој да го наследи - поранешниот началник Бојаџиев или генералот Здравко Поповски, шеф на воениот дел од мисијата на Македонија во НАТО.

Засега е сигурна функцијата на Гошев

Во слична позиција со Стојановски е и директорот на Агенцијата за разузнавање, Виктор Димовски. 4-годишниот мандат му истекува исто 2011-та, но и тој е под директни надлежности на врховниот командант, па и тој лесно може да биде сменет од функцијата.

Но, за разлика од местото началник на ГШ, според информациите на А1, Иванов воопшто не размислува за ново решение. Поблиску е до одлука да побара соединување на Агенцијата со Управата за безбедност и разузнавање - предлог што долго го заговараат дел од безбедносните структури.

Во делот на дипломатијата, Иванов разреши двајца, но досега не именуваше ниту еден амбасадор. Така, 7 македонски амбасади се уште немаат прв човек.

Засега сигурни на функциите се Гошев, судиите во Уставен и Судски совет, оти нивниот мандат е заштитен. Не можат да бидат сменети ако работат законски.

Бре, бре.....се прекрши од работа..