ОТКАЖАА КОМПЈУТЕРИТЕ НА ВЛAДИНИОТ АВИОН

Владиниот авион Лирџет 60 се сервисира во хангарите на бриселскиот аеродром и засега се планира премиерот Груевски да се врати од Париз во Скопје со комерцијален лет. Според пилотите на македонскиот владин авион, во Брисел веќе се присутни инжињери на канадскиот производител Бомбардиер, кои утврдиле дека откажувањето на сензорите се должи на прекин на жица која поврзувала 18 системи на авионот.

„Жицата е на тешко достапно место, па не се знае кога ќе ја завршат работата....сега авионот е на кран, се симулира како да е во воздух за да се утврдат проблемите....во сервисот тука ни кажаа дека три авиони го имале истиот проблем, еден авион дури три- четири пати го имал истиот дефект...не се работи за фабрички грешка туку таква е електрониката....“ вели капетан Александар Дрогрешки, пилот на авионот.

За да се расчистат причините за инцидентот, агенцијата за цивилно воздухопловство денеска формираше комисија за испитување на загрозување на безбедноста. Во наредните 72 часа таа ќе чека, службата за општи и заеднички работи да им поднесе детален извештај за начинот на користење и сервисирање на авионот.

Владиниот комисионер во комисијата Сотир Костов, вели „независно од наодите на комисијата, лично ќе препорачам детален преглед на авионот, заедно со канадскиот производител...ова е трет пат авионот да покаже дефект иако е стар само 4 години “  

Официјално, ова е втор пат да се формира комисија за инцидентет поврзан со Лирџетот за кој Македонија плати 11 милиони долари. Непотврдени информации пак велат дека во изминативе четири години имало неколку проблеми со електрониката на леталото. Познавачите на овој тип на летала сметаат дека електрониката е непредвидлива, но различни се мислењата дали е симптоматично што за само четири години се појавиле неколку проблеми со авионот.

Од производителот на авионите Лирџет, денеска не добивме одговор дали овој проблем се јавува кај останатите авиони од овој тип или се работи за несоодветно одржување на воздухопловот.